විපක්ෂ නායක සජිත් ප්රේමදාස මහතාගේ ප්රධානත්වයෙන් අද (15) සූරියවැව අන්දරවැව ධර්මදූත ආශ්රමයේදී පැවති ගොවි හමුවකදී දෙපිරිසක් අතර ඇති වූ ගැටුමක් හේතුවෙන් උණුසුම්කාරී තත්ත්වයක් හටගෙන තිබේ. ප්රදේශයේ ගොවි ජනතාව මුහුණ දෙන ගැටලු සාකච්ඡා කිරීම සඳහා සමගි ජන බලවේගයේ ප්රාදේශීය නායකයින් විසින් මෙම රැස්වීම සංවිධානය කර තිබුණි.
වාර්තා වන අන්දමට, රැස්වීම අතරතුර වලව වම් ඉවුරේ ගොවි නායකයෙකු සභාව අමතමින් සිටියදී එහි සිටි තවත් පුද්ගලයෙකු ඔහුට විරෝධය පළ කර ඇති අතර, පසුව ඇති වූ බහින්බස් වීම දුරදිග ගොස් පහරදීමක් දක්වා වර්ධනය වී ඇත. රැස්වීම් භූමියේ සිටි පිරිසක් විසින් ප්රශ්න මතු කළ පුද්ගලයා සහ ඔහුගේ පිරිස එතැනින් ඉවත් කිරීමට උත්සාහ කිරීමේදී මෙම කලබලකාරී තත්ත්වය උත්සන්න වී තිබේ.
එහිදී ඇති වූ නොසන්සුන්කාරී තත්ත්වය පාලනය කිරීම සඳහා සූරියවැව පොලිසියේ නිලධාරීන් මැදිහත් වූ අතර, කලහකාරී ලෙස හැසිරුණු බවට චෝදනා කරමින් එක් පුද්ගලයෙකු පොලිස් අත්අඩංගුවට ගෙන ඇත. තත්ත්වය සමනය වීමෙන් අනතුරුව විපක්ෂ නායකවරයා ජනතාව ඇමතීමට කටයුතු කළේය. මෙම සිද්ධිය සම්බන්ධයෙන් අදහස් දැක්වූ රැස්වීමේ සංවිධායකයින් චෝදනා කරන්නේ ජනතා විමුක්ති පෙරමුණේ (JVP) ක්රියාකාරීන් පිරිසක් පැමිණ මෙම රැස්වීම කඩාකප්පල් කිරීමට උත්සාහ කළ බවයි.
