2008 වසරේදී වස්කඩුව ප්රදේශයේ සිදුවූ මනුෂ්ය ඝාතනයකට සම්බන්ධ චූදිතයන් තිදෙනෙකුට කළුතර මහාධිකරණය විසින් අද (13) මරණ දඬුවම නියම කරන ලදී. මෙලෙස මරණ දඬුවම නියම වූයේ කුඩා වස්කඩුව, ලිටිල්ටන් වත්ත ප්රදේශයේ පදිංචි සුරේෂ් කුමාර, සුගත් කුමාර හෙවත් රාළහාමි සහ සමිත සිසිර කුමාර හෙවත් බෙටා යන පුද්ගලයන් තිදෙනාටයි.
මෙම නඩුවට පාදක වූයේ 2008 වසරේ ඔක්තෝබර් මස 23 වැනිදා හෝ ඊට ආසන්න දිනකදී වස්කඩුව ප්රදේශයේ පැවති අවමංගල්ය නිවසකදී චමින්ද කුමාර නමැති අයෙකුට පිහියකින් ඇන ඝාතනය කිරීමේ සිද්ධියයි. වසර 17ක් පුරා විභාග වූ මෙම නඩුවේ තීන්දුව ප්රකාශයට පත් කිරීමට පෙර, මහාධිකරණ සිරිතට අනුව අධිකරණ ශාලාවේ දොර ජනෙල් වසා දමා, විදුලි පහන් නිවා දමා දැඩි නිහඬතාවක් මධ්යයේ විනිසුරුවරයා විසින් සිය තීන්දුව ප්රකාශයට පත් කරන ලදී.
පැමිණිල්ල වෙනුවෙන් රජයේ අධිනීතිඥවරුන් සහ පොලිසිය වෙනුවෙන් සැරයන් මනෝජ් නිශාන් පෙනී සිටි අතර, විත්තිය වෙනුවෙන් ජ්යෙෂ්ඨ නීතිඥ කණිෂ්ක වන්නිආරච්චි මහතා කරුණු ඉදිරිපත් කළේය. දීර්ඝ සාක්ෂි විභාගයකින් අනතුරුව සැකකරුවන්ට එරෙහි චෝදනා සාධාරණ සැකයකින් තොරව ඔප්පු වී ඇති බව නිගමනය කරමින් මහාධිකරණ විනිසුරුවරයා මෙම දඬුවම නියම කළේය.
