ඉන්දියාවේ උත්තර ප්රදේශ් ප්රාන්තයේ ලඛිම්පූර් ඛේරි (Lakhimpur Kheri) දිස්ත්රික්කයේදී 14 හැවිරිදි පිරිමි දරුවෙකු කොටියාගේ ප්රහාරයකින් ඝාතනය වී ඇති බව අද (මාර්තු 03) වාර්තා විය. මියගිය දරුවා ජස්නගර් ප්රදේශයේ පදිංචි රාජ් කමල් සිං ලෙස හඳුනාගෙන ඇති අතර, ඊයේ (මාර්තු 02) රාත්රියේ දුම්රිය මාර්ගයක් අසලදී මෙම දරුණු ප්රහාරය සිදුව තිබේ. ප්රහාරයෙන් පසු කොටියා දරුවාගේ සිරුර එම ස්ථානයේම දමා අසල පිහිටි කුඹුරු දෙසට පලා ගොස් ඇති බව පොලිසිය සඳහන් කරයි.
දරුවාගේ සිරුර අද උදෑසන දුම්රිය මාර්ගය අසල පැල්පතක් අසල තිබී පවුලේ සාමාජිකයන් විසින් සොයාගෙන ඇති අතර පසුව ප්රදේශයේ වනසංරක්ෂණ නිලධාරීන් එම ස්ථානයට පැමිණ විමර්ශන ආරම්භ කර ඇත. සිද්ධිය වූ ස්ථානයේ කොටියාගේ පා සලකුණු (Pug marks) හමු වී ඇති බව වන පරාස නිලධාරී භූපේන්ද්ර සිං මහතා තහවුරු කළේය. දුඩ්වා රක්ෂිත වනාන්තරයට (Dudhwa Tiger Reserve) ආසන්නයේ මෙම ප්රදේශය පිහිටා ඇති බැවින් වන සතුන්ගේ ගැවසීම බහුල බවත්, දරුවා මෝහන ගඟ ආසන්නයේ දුම්රිය මාර්ගය දෙසට ඇවිද ගිය අවස්ථාවේදී මෙම ප්රහාරයට ලක්ව ඇති බවත් බලධාරීහු පවසති.
මියගිය දරුවාගේ පවුලේ අයට රජයෙන් වන්දි මුදලක් ලබා දීමට කටයුතු කරන බවත්, වන සතුන්ගෙන් ජනතාව ආරක්ෂා කිරීම සඳහා මීට පෙර සංවේදී ස්ථානවල වැටවල් ඉදිකිරීම් කර තිබුණ ද මෙවැනි අනතුරු වැළැක්වීමට තවදුරටත් ක්රියා කරන බවත් වනජීවී නිලධාරීහු පවසති.
