විස්සයි විස්ස ලෝක කුසලාන ක්රිකට් තරගාවලියේ ඉන්දියාව සහ පාකිස්තානය අතර අද පැවැත්වෙන තීරණාත්මක තරගය නිමිත්තෙන් කොළඹ ආර්. ප්රේමදාස ක්රීඩාංගණය අවට විශේෂ රථ වාහන සැලැස්මක් ක්රියාත්මක කරන බව ශ්රී ලංකා පොලීසිය දැනුම් දෙයි. ඒ අනුව අද පස්වරු 3.00 සිට ක්රීඩාංගණය දෙසට ප්රවේශ වන මාර්ග රැසක ගමනාගමනය සීමා කෙරෙන අතර තරගය නැරඹීමට එන වාහන සඳහා රථ ගාල් 7ක් වෙන් කර තිබේ. බ්රිටෝ බබාපුල්ලේ හන්දියේ සිට ක්රීඩාංගණය දෙසට ප්රවේශපත්ර සහිත පාර්ශ්වයන්ගේ වාහන 400ක් පමණක් ඇතුළත් කර ගන්නා අතර එම ප්රමාණය ඉක්මවා යන වාහන ආතර් සිල්වා මාවත සහ ග්රෑන්ඩ්පාස් ප්රදේශ වෙත යොමු කෙරෙනු ඇත.
රථවාහන පාලන හා මාර්ග ආරක්ෂාව දිසාව භාර නියෝජ්ය පොලිස්පති ඩබ්ලිව්. පී.ජේ. සේනාධීර මහතා සඳහන් කළ පරිදි වින්සන් පෙරේරා මාවත, ග්රෑන්ඩ්පාස් පාර, සෙබස්තියන් පාර, අඩි 100 පාර, ශ්රී බෝධිරාජ මාවත සහ මාලිගාවත්ත පන්සල පාර ඇතුළු ක්රීඩාංගණය අවට ඇති සියලුම අතුරු මාර්ග පස්වරු 3.00 සිට සීමා කරනු ලැබේ. මේ හේතුවෙන් පීඩාකාරී තත්ත්වයන් මගහරවා ගැනීම සඳහා විකල්ප මාර්ග භාවිතා කරන ලෙස පොලීසිය මහජනතාවගෙන් ඉල්ලා සිටියි.
