ජෛව පද්ධතියට ගැලපෙන ශාක විශේෂයන්හි පැල 400 කට අධික ප්‍රමාණයක් නාවලකන්ද දොළ රක්ෂිතය තුල රෝපණය කරමින් ඊයේ (21) දින සාර්ථකව අවසන් කිරීමට හැකි වු බව සමනල යෞවන සමාජය පවසයි.
කළුතර දිස්ත්‍රික්කයේ වලල්ලාවිට ප්‍රාදේශීය ලේකම් කොට්ඨාශයට අයත් මීගහතැන්න ප්‍රදේශයේ නාවලකන්ද ග්‍රාමය යනු ශ්‍රී ලකාව පුරා පවතින වනාන්තර පද්ධතියේ ඉහලම ජෛව විවිධත්වයක් හිමි සදාහරිත වැසි වනාන්තරවලට මැදි වූ සුන්දර ගම්මානයක් සහිත කඳුකර වනාන්තර පද්ධතියකි.
මෙම ගම්මානය සහිත වනාන්තර පද්ධතිය ආවරණය වන පරිදි වනසංරක්ෂණ දෙපාර්තමේන්තුවට අයත් රක්ෂිත කලාප කීපයක්ම ඇති අතර එම රක්ෂිත ප්‍රදේශ පෝශණය කරමින් ප්‍රදේශ වාසීන්ගේ එදිනෙදා ජල අවශ්‍යතා සපුරාලමින් ප්‍රදේශයේ ජීවය රකිමින් අළුකැටිය, නාවලකන්ද, වැදිවත්ත හරහා බෙන්තර ගඟ දක්වා ගලා බසින දොළ මාර්ගය ප්‍රදේශයේ හදවත බඳු ප්‍රධානතම ජල ප්‍රබවයයි.
ඉතා පිරිසිඳු ජල දහරාවක් වූ මෙම දොළ මාර්ගය දිනෙන් දින විශාල තර්ජනයට ලක්ව විනාශවෙමින් පවතින බව හඳුනා ගැනීමෙන් පසුව නාවලකන්ද සමනල යෞවන සමාජය මගින් වලල්ලාවිට ප්‍රාදේශීය ලේකම්තුමන් දැනුවත් කරන ලදි.ඒ් අනුව මෙම ගැටළුව සඳහා පිළියමක් වශයෙන් දොළ මාර්ගය සහ දොළ ආශ්‍රිත නාවලකන්ද ගම්මානය තුල ක්ෂුද්‍ර ජල පෝෂක ප්‍රදේශ සංවර්ධනය කිරීමේ ව්‍යාපෘතියක් කළුතර දිස්ත්‍රික් ඉඩම් පරිහරණ සැලසුම් කාර්යාලය සහ වලල්ලාවිට ප්‍රාදේශීය ලේකම් කාර්යාලය විසින් 2019 වර්ෂයේදී ආරම්භ කරන ලදී.
එම ව්‍යාපෘතිය තුලින් ප්‍රදේශය තුල විවිධ වූ සංරක්ෂන ක්‍රියාවන් මේ වන විටත් ක්‍රියාත්මක වෙමින් පවතින අතර ප්‍රදේශය හරහා ගලා බසිනා දොළ මාර්ගය දෙපස පිහිටි දොළ රක්ෂිතය තුළ පැල රෝපණය කිරිමේ වැඩසටහනක් 2021.09.09 වන දින ආරම්භ විය. අදියර කීපයක් යටතේ ක්‍රියාත්මක වූ මෙම රුක්රෝපණ වැඩසටහන මගින් ප්‍රදේශයේ ජෛව පද්ධතියට ගැලපෙන ශාක විශේෂයන්හි පැල 400 කට අධික ප්‍රමාණයක් නාවලකන්ද දොළ රක්ෂිතය තුල රෝපණය කරමින් ඊයේ (21) දින සාර්ථකව අවසන් කිරීමට හැකිවිය.
කළුතර දිස්ත්‍රික් ඉඩම් පරිහරණ සැලසුම් කාර්යාලය සහ වලල්ලාවිට ප්‍රාදේශීය ලේකම් කාර්යාලයේ ප්‍රධානත්වයෙන් ක්‍රියාත්මක වූ මෙම රුක් රෝපණ වැඩ සටහන සඳහා වලල්ලාවිට ප්‍රාදේශීය ලේකම් කාර්යාලයේ ඉඩම් අංශය නියෝජනය කරමින් ක්ෂුද්‍ර ජල පෝෂක ප්‍රදේශ සංවර්ධය කිරීමේ ව්‍යාපෘතිය භාර නිලධාරිනී දිලිනි වාසනා මහත්මිය සමගින් ඉන්ද්‍රිකා පතිරගේ, තිලිණි දීපිකා, ලහිරු උදයංග සහ එරංග සමීර යන මහත්ම මහත්මීන් සහ තරුණසේවා නිලධාරී අරුණ ජයතිලක මහතා සමගින් 849 D බෝගොඩකන්ද, නාවලකන්ද වර්තමාන ග්‍රාම නිලධාරී සව්මි අපේක්ෂා මහත්මිය සහ හිටපු ග්‍රාම නිලධාරී දිමුතු හොරවලවිතාන මහතා යන රාජ්‍ය නිලධාරීන්ගේ සහභාගීත්වය සහිතව වලල්ලාවිට යෞවන සමාජ ප්‍රාදේශීය මණ්ඩලයේ මිහිකත සුරැකීමේ කාර්යංශයේ සාමාජිකයින් ඇතුළුව ප්‍රදේශවාසීන් විශාල පිරිසකගේ සහභාගීත්වයෙන් සාර්ථකව ක්‍රියාත්මක විය.
තිරසර භූමි භාවිතය සඳහා නාවලකන්ද කඳු පන්තියේ ක්ෂුද්‍ර ජල පෝෂක ප්‍රදේශ හඳුනා ගනිමින්, ඒ සදහා භූමි පරිහරණ සැලැස්මක් සකස් කර නාවලකන්ද ක්ෂුද්‍ර ජල පෝෂක ප්‍රදේශය තුල භූමි සම්පත් කළමනාකරණය තුලින් ප්‍රමාණාත්මක හා ගුණාත්මක බවින් ඉහළ ජල ගලනයක් සහිත සංරක්ෂිත පරිසරයක් ඇති කිරිම සඳහා ක්‍රියාත්මක වූ මෙම වැඩසටහන ශ්‍රි ලංකාව පුරා පවතින්නා වූ අනෙකුත් ජල පෝෂක ප්‍රදේශ තුලද ක්‍රියාත්මක කිරීමට හැකි නම් වර්තමානයේ අප මුහුණපාමින් සිටින ජල අර්බුධයට හොඳම විසඳුම විය හැකි බව මෙහිදී සාකච්ඡාවූ අතර ප්‍රදේශයේ තරුණයන් දායක කර ගනිමන් රජ්‍ය නිලධාරීන්ගේ සක්‍රීය දායක්වය මෙම වැඩසටහනට ලබා දීම රුක් රෝපණ වැඩසටහන සඳහා සහභගී වූ ප්‍රදේශවාසී බොහෝ දෙනා අතර පැසසුමට ලක් විය.
