ඇමෙරිකානු ජනාධිපති ඩොනල්ඩ් ට්රම්ප්ගේ පරිපාලනය විසින් මීට පෙර රජයන් විසින් ට්රැන්ස්ජෙන්ඩර් (සංක්රාන්ති ලිංගික) සිසුන්ගේ අයිතිවාසිකම් ආරක්ෂා කිරීම වෙනුවෙන් පාසල් දිස්ත්රික්ක කිහිපයක් සමඟ ඇති කරගෙන තිබූ එකඟතා ගිවිසුම් (Resolution Agreements) හයක් අහෝසි කිරීමට පියවර ගෙන තිබේ. ඇමෙරිකානු අධ්යාපන දෙපාර්තමේන්තුව සඳහන් කරන්නේ අධ්යාපනයේදී ලිංගිකත්වය මත පදනම්ව වෙනස් කොට සැලකීම තහනම් කරන ‘Title IX’ සිවිල් අයිතිවාසිකම් පනත අවභාවිත කරමින් මෙම ගිවිසුම් ඇති කරගෙන තිබූ බවයි.
ට්රම්ප් ජනාධිපතිවරයා බලයට පත්වීමෙන් පසු සංක්රාන්ති ලිංගික පුද්ගලයන්ගේ අයිතිවාසිකම් සීමා කරමින් විධායක නියෝග මාලාවක් නිකුත් කර ඇති අතර, ඇමෙරිකානු රජය පිළිගනු ලබන්නේ ස්ත්රී සහ පුරුෂ යන ලිංගිකත්වයන් දෙක පමණක් බවට ද ප්රකාශ කර තිබේ. මීට අමතරව දේශගුණික විපර්යාස වැඩසටහන්, විවිධත්ව මුලපිරීම් සහ ගාසා යුද්ධයට එරෙහිව සිදුවන පලස්තීන හිතවාදී විරෝධතා සම්බන්ධයෙන් ද දැඩි ක්රියාමාර්ග ගනිමින් සිටින ට්රම්ප් රජය, එම උපදෙස් පිළිනොපදින පාසල් සහ විද්යාල සඳහා ලබා දෙන ෆෙඩරල් ප්රතිපාදන අත්හිටුවන බවට ද අනතුරු අඟවා ඇත.
කැලිෆෝනියාව, ඩෙලවෙයාර්, වොෂින්ටන් සහ පෙන්සිල්වේනියා යන ප්රාන්තවල පාසල් දිස්ත්රික්ක කිහිපයක් සහ ටැෆ්ට් විද්යාලය සමඟ පැවති මෙම එකඟතා ගිවිසුම් අධීක්ෂණය කිරීම හෝ බලාත්මක කිරීම මින් ඉදිරියට සිදු නොකරන බව අධ්යාපන දෙපාර්තමේන්තුව වැඩිදුරටත් නිවේදනය කර තිබේ. රජයේ මෙම ක්රියාමාර්ගය මානව හිමිකම් සංවිධානවල දැඩි දෝෂදර්ශනයට ලක්ව ඇත.
