අමෙරිකානු භූමියේ උපත ලබන දරුවන්ට හිමිවන පුරවැසිභාවය (Birthright Citizenship) සීමා කිරීම සම්බන්ධයෙන් වන තීරණාත්මක නඩු විභාගයකට සහභාගී වීම සඳහා ජනාධිපති ඩොනල්ඩ් ට්රම්ප් අද (01) එරට ශ්රේෂ්ඨාධිකරණය වෙත පැමිණීමට නියමිතය. ධූරයේ රැඳී සිටින ජනාධිපතිවරයෙකු මෙලෙස ශ්රේෂ්ඨාධිකරණ වාද විවාදවලට සෘජුව සහභාගී වන පළමු අවස්ථාව මෙය ලෙස ඉතිහාසයට එක් වේ.
තම දෙවන ධූර කාලයේ පළමු දිනයේම ජනාධිපති ට්රම්ප් අත්සන් කරන ලද විධායක නියෝගයකින් ප්රකාශ කර තිබුණේ, නීති විරෝධී ලෙස හෝ තාවකාලිකව අමෙරිකාවේ රැඳී සිටින දෙමාපියන්ට දාව මෙරට උපදින දරුවන්ට අමෙරිකානු පුරවැසිභාවය හිමි නොවන බවයි. අමෙරිකානු ආණ්ඩුක්රම ව්යවස්ථාවේ 14 වන සංශෝධනයට පටහැනි බව පවසමින් පහළ උසාවියක් විසින් මෙම නියෝගය අවලංගු කළ අතර, එයට එරෙහිව ජනාධිපතිවරයා ඉදිරිපත් කළ අභියාචනය අද විභාගයට ගැනේ.
වසර ගණනාවක සිට අමෙරිකානු නීතියට අනුව එරට භූමියේ උපදින ඕනෑම අයෙකුට පුරවැසිභාවය හිමි වුවද, ජනාධිපති ට්රම්ප්ගේ මෙම නව පියවර හරහා එය දැඩි ලෙස සීමා කිරීමට උත්සාහ කරයි. ඊයේ (මාර්තු 31) ඕවල් කාර්යාලයේදී මාධ්යවේදීන් ඇමතූ ජනාධිපතිවරයා තමා අනිවාර්යයෙන්ම අධිකරණයට යන බව තහවුරු කළේය. මෙය ඔහුගේ දැඩි සංක්රමණික මර්දන වැඩපිළිවෙළෙහි තවත් එක් තීරණාත්මක පියවරක් ලෙස සැලකේ.
