ඉරාන උත්තරීතර නායක අයතුල්ලා අලි කමේනිගේ අභාවයෙන් පසු එම ධුරය සඳහා පත් කිරීමට සූදානම් කර සිටි අනුප්රාප්තිකයන් (Potential Successors) සියලු දෙනාම පාහේ ඇමරිකානු සහ ඊශ්රායල ඒකාබද්ධ ගුවන් ප්රහාරවලින් ජීවිතක්ෂයට පත්ව ඇති බව ඇමරිකානු ජනාධිපති ඩොනල්ඩ් ට්රම්ප් අද (02) ප්රකාශ කළේය. ABC පුවත් සේවය සහ @clashreport උපුටා දක්වමින් වාර්තා වන පරිදි, ට්රම්ප් අවධාරණය කර ඇත්තේ මෙම “ඔපරේෂන් එපික් ෆියුරි” මෙහෙයුම කෙතරම් සාර්ථක වී ඇත්ද යත්, ඉරාන නායකත්වයේ දෙවන සහ තෙවන මට්ටම්වල සිටි අපේක්ෂකයන් පවා දැන් ජීවතුන් අතර නැති බවයි. “ප්රහාරය ඉතාමත් සාර්ථකයි, අපේක්ෂකයන්ගෙන් බහුතරයක් ඉවරයි… ඔවුන් හැමෝම මියගොස් ඇත. දෙවැනි හෝ තුන්වැනි ස්ථානයේද? ඔවුන්ද මියගොස් ඇත” යනුවෙන් ජනාධිපතිවරයා සිය සුවිශේෂී ශෛලියෙන් සඳහන් කර තිබේ.
මෙම තත්ත්වය හමුවේ ටෙහෙරානයේ පාලන තන්ත්රය තුළ දැවැන්ත නායකත්ව රික්තයක් (Leadership Vacuum) නිර්මාණය වී ඇති අතර, මීළඟට පාලනය භාරගැනීමට සුදුසු මට්ටමේ කිසිදු ප්රබල නායකයෙකු ඉතිරිව නැති බව බුද්ධි අංශ වාර්තා පෙන්වා දෙයි. සාමාන්යයෙන් අනුප්රාප්තිකයෙකු තෝරාගැනීමට වසර ගණනාවක් සැලසුම් කරන ඉරාන ‘විශේෂඥ මණ්ඩලය’ (Assembly of Experts) පවා මෙම හදිසි සහ විනාශකාරී ප්රහාර හමුවේ අසරණ වී ඇති බව පෙනේ. ට්රම්ප්ගේ මෙම ප්රකාශයත් සමඟ ඉරානයේ ඉතිරිව සිටින හමුදා සහ දේශපාලන නිලධාරීන් අතර දැඩි අර්බුදයක් හටගෙන ඇති අතර, මෙය ඉරාන ඉස්ලාමීය සමූහාණ්ඩුවේ 47 වසරක පාලනයේ අවසානය සනිටුහන් කරන්නක් බව පෙනී යයි.
