බටහිර ආසියානු කලාපයේ පවතින දැඩි යුදමය ආතතිය මධ්යයේ, ඇමරිකානු ජනාධිපති ඩොනල්ඩ් ට්රම්ප් සහ ඉරානය විසින් නිකුත් කරන ලද පරස්පර ප්රකාශ හේතුවෙන් රාජ්ය තාන්ත්රික ක්රියාවලිය පිළිබඳව දැඩි අවිශ්වාසයක් මතු වී තිබේ. මාර්තු 23 වන සඳුදා Fox News නාලිකාව සමඟ සම්මුඛ සාකච්ඡාවකට එක්වෙමින් ජනාධිපති ට්රම්ප් ප්රකාශ කළේ පසුගිය දින දෙක පුරා ඉරානය සමඟ ඉතා ප්රබල සහ සාර්ථක සාකච්ඡා පැවැත් වූ බවයි. කෙසේ වෙතත් ඉරානය එවැනි කිසිදු සාකච්ඡාවක් සිදු වූ බව තරයේ ප්රතික්ෂේප කරන අතර ට්රම්ප්ගේ මෙම ප්රකාශ හුදෙක් “බොරු ප්රකාශ” ලෙස හඳුන්වා දී ඇත.
ඉරානය සමඟ එකඟතාවයකට පැමිණීම සඳහා ඇමරිකාව මූලික වශයෙන් කරුණු කිහිපයක් කෙරෙහි අවධානය යොමු කර ඇති බව ට්රම්ප් මෙහිදී අනාවරණය කළේය. ඉරානය සතුව කිසිදු න්යෂ්ටික අවියක් නොතිබිය යුතු බවත් ඔවුන්ගේ මිසයිල වැඩපිළිවෙළ පාලනය කරමින් මැදපෙරදිග කලාපයේ සාමය ඇති කිරීම තම ප්රධාන අරමුණු බවත් ඔහු පවසයි. මෙම සාකච්ඡා සාර්ථක බව පවසමින් ඉරාන බලශක්ති මධ්යස්ථාන වෙත එල්ල කිරීමට නියමිතව තිබූ ප්රහාර දින පහක කාලයකට කල් දැමීමටද ට්රම්ප් පියවර ගෙන තිබේ. ඉරානයට ඉතා දැඩි ලෙස එකඟතාවයකට පැමිණීමට අවශ්ය වී ඇති බව ට්රම්ප් අවධාරණය කළද, ඉදිරි දින කිහිපය තුළ මෙම රාජ්ය තාන්ත්රික ගැටුම තවදුරටත් උණුසුම් වනු ඇතැයි විදෙස් විචාරකයෝ පවසති.
