අමෙරිකානු ජනාධිපති ඩොනල්ඩ් ට්රම්ප් ඊයේ (මාර්තු 24) ධවල මන්දිරයේදී සිදුකළ ප්රකාශයක් ලෝක දේශපාලන කරළියේ දැඩි කතාබහට ලක්ව තිබේ. සති කිහිපයක් පුරා මැදපෙරදිග කලාපයේ පැවති උග්ර යුදමය වාතාවරණය මධ්යයේ ඔහු කියා සිටියේ ඉරානය විසින් තමන් වෙත අතිවිශාල වටිනාකමකින් යුතු “තෑග්ගක්” ලබා දුන් බවයි. නව දේශීය ආරක්ෂක ලේකම්වරයාගේ දිවුරුම් දීමේ උත්සවයෙන් අනතුරුව මාධ්යවේදීන් නැගූ ප්රශ්නවලට පිළිතුරු දෙමින් ජනාධිපතිවරයා මෙම අබිරහස් ප්රකාශය සිදු කළේය.
මෙම “තෑග්ග” න්යෂ්ටික වැඩසටහනට සම්බන්ධ එකක් නොවන බවත්, එය තෙල් සහ ගෑස් වැනි බලශක්ති ක්ෂේත්රයට අදාළ අතිශය වටිනා එකඟතාවක් බවත් ඔහු මෙහිදී අනාවරණය කළේය. හෝමුස් සමුද්ර සන්ධිය හරහා සිදුවන ඉන්ධන ප්රවාහය යථා තත්ත්වයට පත් කිරීම සම්බන්ධයෙන් යම් සුබවාදී එකඟතාවක් මෙයට ඇතුළත් බවට ද ඉඟි පළ විය. තමන් දැන් ගනුදෙනු කරන්නේ ඉරානයේ සිටින “නිවැරදි පුද්ගලයින්” සමඟ බවත්, මෙම තෑග්ග ලැබීමෙන් පසුව යුද්ධය ජයග්රහණය කර ඇති බවත් ඔහු වැඩිදුරටත් සඳහන් කළේය.
මෙම ප්රකාශයත් සමඟ ලෝක වෙළෙඳපොළේ බොරතෙල් මිලෙහි කැපී පෙනෙන පහළ යාමක් වාර්තා වූ අතර, එය වසරේ වාර්තා වූ විශාලතම මිල අඩුවීම ලෙස ද සැලකේ. කෙසේ වෙතත්, ටෙහෙරානය මෙම ප්රකාශය සම්බන්ධයෙන් මෙතෙක් නිල ප්රතිචාරයක් දක්වා නොමැති අතර, මෙය අමෙරිකානු ජනාධිපතිවරයා විසින් තෙල් මිල පාලනය කිරීමට සහ ආර්ථිකය ස්ථාවර කිරීමට සිදුකරන ලද උපායමාර්ගික ප්රකාශයක් දැයි විදෙස් දේශපාලන විශ්ලේෂකයෝ ප්රශ්න කරති.
