ඇමරිකා එක්සත් ජනපදය සහ ඉශ්රායලය එක්ව ඉරානයට එරෙහිව පවත්වාගෙන යන යුද්ධය “ඉතා ඉක්මනින්” අවසන් වන බවට ජනාධිපති ඩොනල්ඩ් ට්රම්ප් කළ ප්රකාශයත් සමඟ ලෝක වෙළඳපොළේ බොරතෙල් මිල ගණන් කැපී පෙනෙන ලෙස පහත වැටී තිබේ. පසුගිය සඳුදා වසර හතරකට පසු වාර්තා වූ ඉහළම මිල මට්ටමට ළඟා වූ බොරතෙල් මිල, මෙම ප්රකාශයත් සමඟ යළිත් පහළ යාම විශේෂත්වයකි.
පසුගිය පැය 24ක කාලය තුළ ගෝලීය වෙළඳපොළ තුළ අසාමාන්ය උච්චාවචනයක් වාර්තා වූ අතර, එහිදී ජාත්යන්තර මිණුම්දණ්ඩ වන බ්රෙන්ට් (Brent) වර්ගයේ බොරතෙල් බැරලයක මිල 2022 රුසියානු-යුක්රේන ආක්රමණයෙන් පසු ප්රථම වතාවට ඇමරිකානු ඩොලර් 100 සීමාව ඉක්මවා ගියේය. සඳුදා දිනයේදී එය ඩොලර් 119.50ක් දක්වා ඉහළ ගිය ද, ට්රම්ප් ජනාධිපතිවරයා CBS පුවත් සේවය සමඟ පැවති සම්මුඛ සාකච්ඡාවකදී යුද්ධය බොහෝ දුරට අවසන් බව ප්රකාශ කිරීමත් සමඟ එය ඩොලර් 98.96ක් දක්වා සීඝ්රයෙන් පහත වැටුණි.
මෙම තත්ත්වය කොටස් වෙළඳපොළ කෙරෙහි ද ධනාත්මක බලපෑමක් ඇති කර ඇති අතර, තෙල් මිල ඉහළ යාම හේතුවෙන් දැඩි පීඩනයකට ලක්ව තිබූ නිව්යෝර්ක් කොටස් වෙළඳපොළේ S&P 500 දර්ශකය දිනය අවසානයේ වාසි සහගත මට්ටමකට පැමිණීමට සමත් විය. මැදපෙරදිග කලාපයේ පවතින අස්ථාවරත්වය හමුවේ ඉහළ ගිය ඉන්ධන පිරිවැය සහ උද්ධමනකාරී බිය, ජනාධිපතිවරයාගේ මෙම ප්රකාශයත් සමඟ යම් දුරකට සමනය වී ඇති බව ආර්ථික විශ්ලේෂකයෝ පෙන්වා දෙති.
