ඉරානයට එරෙහිව දැවැන්ත හමුදා ප්රහාරයක් එල්ල කිරීමට පෙර, ඇමෙරිකානු ජනාධිපති ඩොනල්ඩ් ට්රම්ප් අවම වශයෙන් 74 වතාවක්ම එකම පණිවුඩයක් ලබා දී තිබූ බව ධවල මන්දිරය සඳහන් කරයි. එනම්, “ටෙහෙරානයට කිසිසේත්ම න්යෂ්ටික අවියක් තබා ගැනීමට ඉඩ නොදෙන” බවයි. ට්රම්ප් දශක කිහිපයක සිට මෙම ස්ථාවරයේ දැඩිව සහ නොසැලී සිටි බව පෙන්වා දීම සඳහා ධවල මන්දිරය විසින් 2011 වසරේ සිට ඔහු කළ ප්රකාශ ඇතුළත් විශේෂ වාර්තාවක් ද නිකුත් කර තිබේ.
මෙම වසරේ පෙබරවාරි 24 වැනිදා පවා ට්රම්ප් ප්රකාශ කර තිබුණේ, ‘Midnight Hammer’ මෙහෙයුමෙන් පසුව ද ඉරානය සිය න්යෂ්ටික වැඩසටහන නැවත ගොඩනැගීමට උත්සාහ කරන බවත්, ලොව ප්රධානතම ත්රස්තවාදී අනුග්රාහකයාට න්යෂ්ටික බලය ලබා ගැනීමට තමා කිසිසේත් ඉඩ නොදෙන බවත්ය. මැදපෙරදිග සාමය පවත්වා ගැනීමට නම් ඉරානය සතුව න්යෂ්ටික අවි නොතිබිය යුතු බව ඔහුගේ දැඩි මතයයි. යුරේනියම් සාරවත් කිරීමේ ඕනෑම ක්රියාවලියකට ඔහු සිය විරෝධය පළ කර ඇත්තේ “අපට සාරවත් කිරීම් අවශ්ය නැත” යනුවෙන් සෘජුවම පවසමිනි.
ජනාධිපති ධුරයට පත්වීමට පෙර සිටම, එනම් 2011 වසරේදී පවා ඔහු පවසා තිබුණේ ඉරානය න්යෂ්ටික බලවතෙකු වීමට ඉඩ දිය නොහැකි බවයි. 2024 වසරේදී ඔහු අනතුරු ඇඟවූයේ ඉරානය න්යෂ්ටික අවි ලබාගතහොත් ඉශ්රායලය විනාශ වී යනු ඇති බවයි. වසර 15ක් පුරා විවිධ වේදිකාවල සහ සම්මුඛ සාකච්ඡාවලදී ට්රම්ප් කළ ප්රකාශයන්හි වචන වෙනස් වුවද, එහි හරය සහ අවධාරණය කිසිලෙසකත් වෙනස් වී නොමැති බව ධවල මන්දිරය පෙන්වා දෙයි.
ඉරානයේ න්යෂ්ටික වැඩසටහන වසර දහයකට වැඩි කාලයක් තිස්සේ බටහිර ආසියාවේ ඇමෙරිකානු විදේශ ප්රතිපත්තියේ ප්රධාන අර්බුදයක් වී තිබුණි. සම්බාධක, පරීක්ෂණ සහ රාජ්යතාන්ත්රික ගැටලු මධ්යයේ වුවද ඉරානය සිය මාවත වෙනස් නොකිරීම නිසා අවසානයේ මෙම මිලිටරි ප්රහාරය එල්ල කිරීමට තීරණය කළ බව අමෙරිකානු බලධාරීන්ගේ මතය වී තිබේ.
