ලෝකයේ ප්රධානතම තෙල් ප්රවාහන මාර්ගය වන හෝමුස් සමුද්ර සන්ධිය (Strait of Hormuz), ජනාධිපති ඩොනල්ඩ් ට්රම්ප් විසින් මියාමි හි පැවති ආයෝජන සමුළුවකදී විහිළුවට මෙන් “ට්රම්ප් සමුද්ර සන්ධිය” (Strait of Trump) ලෙස නම් කර තිබේ. ඉරානය සමඟ පවතින යුද්ධයේදී තීරණාත්මක මංසන්ධියක් වන මෙම මුහුදු මාර්ගය විවෘත කළ යුතු බව පවසමින් ඔහු කළ මෙම ප්රකාශය සභාගැබේ සිනහවට හේතු විය. “ට්රම්ප් සමුද්ර සන්ධිය විවෘත කළ යුතුයි.. සමාවෙන්න මම අදහස් කළේ හෝමුස්” යනුවෙන් ඔහු පවසද්දී, මාධ්ය මෙය වැරදීමක් ලෙස වාර්තා කළ හැකි වුවද තමා අතින් වැරදීම් සිදු නොවන බව ඔහු පසුව අවධාරණය කළේය.
මෙම ප්රකාශය හුදු විහිළුවක් පමණක් නොව, හෝමුස් සමුද්ර සන්ධියේ පාලනය තමා සතු කරගෙන එය තමාගේ නමින් හෝ “අමෙරිකානු සමුද්ර සන්ධිය” ලෙස නම් කිරීමට ට්රම්ප් සලකා බලමින් සිටින බව නිව්යෝර්ක් පෝස්ට් පුවත්පත ද වාර්තා කර ඇත. මීට පෙර මෙක්සිකෝ බොක්ක නම් කිරීමේදී ද ඔහු මෙවැනිම උත්සාහයක නිරත වූ අතර, වොෂින්ටනයේ පිහිටි ජෝන් එෆ්. කෙනඩි කලා මධ්යස්ථානය ද පසුගිය දෙසැම්බරයේදී “ට්රම්ප්-කෙනඩි මධ්යස්ථානය” ලෙස නම් කිරීමට කටයුතු කර තිබුණි. යුද්ධය හේතුවෙන් දිනකට තෙල් බැරල් මිලියන 20ක ප්රවාහනය අඩාල වී ඇති පසුබිමක, මෙම සමුද්ර සන්ධියේ පාලනය “තමා සහ ඉරාන අයතුල්ලා” අතර හවුල්කාරීත්වයකින් පවත්වා ගැනීමට ඇති හැකියාව පිළිබඳව ද ට්රම්ප් මීට පෙර අදහස් පළ කර තිබේ.
