ෆ්ලොරිඩාවේ ඩොරල්හිදී ඊයේ (07) පැවැත්වූ “Shield of the Americas” සමුළුව අමතමින් ඇමෙරිකානු ජනාධිපති ඩොනල්ඩ් ට්රම්ප් ප්රකාශ කළේ ලතින් ඇමෙරිකානු කලාපයේ මත්ද්රව්ය කාටෙල් කල්ලි මර්දනය කිරීම සඳහා ඇමෙරිකානු හමුදා බලය සහ මිසයිල ප්රහාර පවා භාවිතා කිරීමට තමා සූදානම් බවයි. මෙම අපරාධ කල්ලි කලාපීය ආරක්ෂාවට තර්ජනයක් වන “පිළිකාවක්” ලෙස හැඳින්වූ ඔහු, මත්ද්රව්ය ජාවාරමට එරෙහිව සටන් කිරීම සඳහා රටවල් 12ක සහභාගීත්වයෙන් යුත් නව සභාගයක් (Americas Counter-Cartel Coalition) පිහිටුවීමට ද මෙහිදී පියවර ගත්තේය.
මෙම සමුළුවට ආර්ජන්ටිනාවේ ජේවියර් මිලෙයි සහ එල් සැල්වදෝරයේ නයිබ් බුකෙලේ වැනි දක්ෂිණාංශික නායකයන් සහභාගී වූ අතර, මෙක්සිකෝව සහ බ්රසීලය වැනි ප්රමුඛ රටවල් මින් බැහැරව සිටීම විශේෂත්වයකි. කාටෙල් කල්ලි මර්දනය කිරීමට පොලිසිය යෙදවීම වෙනුවට සෘජුවම හමුදා බලය භාවිතා කළ යුතු බව අවධාරණය කළ ට්රම්ප් මහතා, “ඔබට අවශ්ය නම් අපි මිසයිල පවා ලබා දෙනවා, ඒවා ඉතා නිවැරදි ඉලක්ක වෙත එල්ල කර ජාවාරම්කරුවන් විනාශ කළ හැකියි” යනුවෙන් පවසා තිබේ. විශේෂයෙන්ම මෙක්සිකෝව කාටෙල් ප්රචණ්ඩත්වයේ මධ්යස්ථානය බවට පත්ව ඇති බවත්, එය පාලනය කිරීමට එරට ජනාධිපතිනියට සහාය වීමට තමා සූදානම් බවත් ඔහු සඳහන් කළේය.
මෑතකදී වෙනිසියුලාවේදී සිදු කළ “Operation Absolute Resolve” මෙහෙයුම මගින් නිකලස් මදුරෝ බලයෙන් පහ කිරීම විශාල සාර්ථකත්වයක් ලෙස හැඳින්වූ ජනාධිපතිවරයා, කියුබාවේ කොමියුනිස්ට් පාලනය ද දැන් පවතින්නේ සිය “අවසාන මොහොතේ” බවට අනතුරු ඇඟවීය. කියුබාවට ලැබෙන තෙල් සහ මූල්ය ආධාර කප්පාදු කිරීම හරහා එරට පාලන තන්ත්රය වෙනස් කිරීම ඉතා පහසු වනු ඇති බව ඔහුගේ අදහසයි. චීනය වැනි බාහිර බලවේගවලට ලතින් ඇමෙරිකානු කලාපය තුළ ඉඩක් ලබා නොදෙන “Donroe Doctrine” නැමැති තම නව ප්රතිපත්තිය යටතේ පැනමා ඇළේ පාලනය සම්බන්ධයෙන් ද ඉදිරියේදී දැඩි තීරණ ගන්නා බව ඔහු වැඩිදුරටත් කියා සිටියේය.
