කුවේට්හිදී මියගිය ඇමරිකානු සෙබළුන් හය දෙනෙකුගේ දේහයන් ඇමරිකාවට රැගෙන ආ අවස්ථාවේ පැවැති උත්තමාචාර උළෙලේදී (Dignified Transfer) ජනාධිපති ඩොනල්ඩ් ට්රම්ප් හිස්වැසුමක් පැළඳ සිටීම සම්බන්ධයෙන් ජාත්යන්තර මාධ්යවල දැඩි විවේචනයක් එල්ල වී තිබේ. ඩෙලවෙයාර්හි ඩෝවර් ගුවන් හමුදා කඳවුරේදී පැවති මෙම උළෙලේදී ජනාධිපතිවරයා සිය ‘USA’ සන්නාමය සහිත සුදු පැහැති ගොල්ෆ් හිස්වැස්ම ගලවා දේහයන්ට ගෞරව නොකිරීම සම්බන්ධයෙන් සමාජ මාධ්ය ඔස්සේ ද දැඩි විරෝධයක් එල්ල විය.
කෙසේ වෙතත්, කොන්සර්වේටිව් මතධාරී ෆොක්ස් නිව්ස් (Fox News) නාලිකාව මෙම විවේචනවලින් ජනාධිපතිවරයා ආරක්ෂා කිරීම සඳහා සෙනසුරාදා සහ ඉරිදා දිනවල විකාශය වූ වාර්තා කිහිපයකදීම පැරණි වීඩියෝ දර්ශන භාවිතා කර ඇති බව අනාවරණය වී තිබේ. ඔවුන් පෙන්වා ඇත්තේ පසුගිය දෙසැම්බර් මාසයේදී සිරියාවේදී මියගිය සෙබළුන්ට ජනාධිපතිවරයා හිස්වැසුම් රහිතව ගෞරව කළ අවස්ථාවක වීඩියෝ දර්ශනයකි. එම පැරණි දර්ශනවල “සෙනසුරාදා” (Saturday) යනුවෙන් වැරදි ලේබලයක් ද යොදා තිබූ බව නිරීක්ෂණය වී ඇත.
පසුව එල්ල වූ විවේචන හමුවේ ෆොක්ස් නිව්ස් නාලිකාව ප්රකාශ කළේ, වීඩියෝ දර්ශන තෝරා ගැනීමේදී සිදු වූ වැරදීමකින් පැරණි දර්ශන විකාශය වූ බවත් ඒ පිළිබඳව තමන් කණගාටුව පළ කරන බවත්ය. 2021 වසරේදී ජෝ බයිඩන් මෙවැනිම උළෙලකදී සිය අත් ඔරලෝසුව දෙස බැලීම දැඩි ලෙස විවේචනය කළ ෆොක්ස් නිව්ස් නාලිකාව, ට්රම්ප් ජනාධිපතිවරයාගේ මෙම ක්රියාව වසන් කිරීමට උත්සාහ කිරීම මාධ්ය ආචාරධර්ම උල්ලංඝනය කිරීමක් බව විචාරකයෝ පවසති.
ඉරිදා දිනයේදී ජනාධිපතිවරයා ෆ්ලොරිඩාවේ ගොල්ෆ් ක්රීඩා කරමින් සිටියදී ද එම හිස්වැස්මම පැළඳ සිටිනු ඡායාරූප ගත කර තිබේ. මෙම සිදුවීමත් සමඟ ඉරාන යුද්ධය සඳහා ඇමරිකානු සෙබළුන්ගේ ජීවිත පූජා කිරීම සහ ජනාධිපතිවරයා ඔවුන්ට දක්වන ගෞරවය පිළිබඳව ඇමරිකාව තුළ දේශපාලන කතිකාවතක් නිර්මාණය වී ඇත.
