ඉරානයේ සිට තුර්කිය දෙසට එල්ල කරන ලද තුන්වන බලිස්ටික් මිසයිලය ද නැගෙනහිර මධ්යධරණී කලාපයේ ස්ථාපිත නේටෝ (NATO) ගුවන් ආරක්ෂක පද්ධතිය මගින් සාර්ථකව විනාශ කර ඇති බව තුර්කි ආරක්ෂක අමාත්යාංශය අද (13) නිවේදනය කළේය. මෙම සිදුවීම සම්බන්ධයෙන් තුර්කිය ඉරාන රජයෙන් වහාම පැහැදිලි කිරීමක් ඉල්ලා ඇති අතර, සිය දේශසීමා ආරක්ෂාව සම්බන්ධයෙන් දැඩි අවධානයෙන් පසුවන බව ද අවධාරණය කර ඇත.
මීට පෙර මාර්තු 4 වැනිදා සහ 9 වැනිදා ද ඉරානයේ සිට එල්ල වූ මිසයිල දෙකක් නේටෝ ආරක්ෂක පද්ධති මගින් බිම හෙළීමට කටයුතු කර තිබුණි. ඉන් දෙවන මිසයිලය තුර්කි ගුවන් සීමාවට ඇතුළු වී තිබූ බවත්, මෙම මිසයිල ප්රහාර මාලාව නේටෝ සාමාජික රටක් වන තුර්කියේ සහ සමස්ත සන්ධානයේ ආරක්ෂාව දැඩි පරීක්ෂාවකට ලක් කර ඇති බවත් විදේශ වාර්තා සඳහන් කරයි. නේටෝ සංවිධානයේ දෙවන විශාලතම හමුදාව හිමි තුර්කිය, තම රටට එල්ල වන ඕනෑම තර්ජනයකට එරෙහිව නොපසුබටව ක්රියා කරන බව නිවේදනය කර තිබේ.
එක්සත් ජනපදය සහ ඊශ්රායලය සමඟ පවතින යුදමය තත්ත්වය මධ්යයේ ඉරානය මෙතෙක් ප්රකාශ කර ඇත්තේ තමන් තුර්කිය ඉලක්ක කරගෙන හිතාමතා ප්රහාර එල්ල නොකරන බවයි. කෙසේ වෙතත්, තුර්කිය සිය ගුවන් සීමාව සහ භූමිය ආරක්ෂා කර ගැනීමට අවශ්ය සියලු පියවර ගන්නා බවත්, සිද්ධිය පිළිබඳව ඉරානය සමඟ සාකච්ඡා පවත්වන බවත් තුර්කි ආරක්ෂක අමාත්යාංශය වැඩිදුරටත් සඳහන් කළේය.
