කටුනායක බණ්ඩාරනායක ජාත්යන්තර ගුවන් තොටුපළ හරහා රුපියල් මිලියන 2.06ක් පමණ වටිනා ලැප්ටොප් පරිගණක සහ ජංගම දුරකථන ඇතුළු ප්රකාශ නොකළ භාණ්ඩ තොගයක් මෙරටට ගෙන ඒමට උත්සාහ කළ ශ්රී ලාංකික මගීන් දෙදෙනෙකු අද (26) උදෑසන රේගු නිලධාරීන් කණ්ඩායමක් විසින් අත්අඩංගුවට ගෙන තිබේ. කිසිදු භාණ්ඩයක් ප්රකාශ කිරීමට නොමැති මගීන් සඳහා වෙන් කර ඇති “හරිත මාවත” (Green Channel) ඔස්සේ මෙම භාණ්ඩ තොගය රැගෙන යාමට උත්සාහ කිරීමේදී ඔවුන් මෙලෙස කොටු වී ඇත.
අත්අඩංගුවට ගත් සැකකරුවන් කඳාන ප්රදේශයේ පදිංචි 47 හැවිරිදි කාන්තාවක් සහ කොළඹ නාරාහේන්පිට ප්රදේශයේ පදිංචි 47 හැවිරිදි පිරිමි පුද්ගලයෙකු බව හඳුනාගෙන තිබේ. ඔවුන් අද උදෑසන ඩුබායි සහ ඉන්දියාවේ බැංගලෝර් සිට පැමිණි ශ්රී ලංකන් එයාර්ලයින්ස් යානා දෙකකින් මෙරටට පැමිණ ඇති බව වාර්තා වේ. ඔවුන් සන්තකයේ තිබී සුවඳ විලවුන්, ජංගම දුරකථන, ලැප්ටොප් පරිගණක සහ කරාබුනැටි තොගයක් රේගු නිලධාරීන් විසින් සොයාගෙන ඇත.
රේගු නිලධාරීන් සඳහන් කළේ අදාළ භාණ්ඩ සඳහා අවශ්ය ආනයන බලපත්ර මෙන්ම ජාතික ඖෂධ නියාමන අධිකාරියේ සහ ශ්රී ලංකා විදුලි සංදේශ නියාමන කොමිෂන් සභාවේ (TRCSL) අනුමැතිය ලබාගෙන නොතිබූ බවයි. මේ වන විට රේගු බලධාරීන් විසින් භාණ්ඩ තොගය රාජසන්තක කර ඇති අතර සිද්ධිය සම්බන්ධයෙන් වැඩිදුර විමර්ශන ක්රියාත්මක වේ.
