6 ශ්රේණිය ඉංග්රීසි මොඩියුලයට අසභ්ය වෙබ් අඩවියක සබැඳියක් (Link) ඇතුළත් වීමේ බරපතල සිද්ධිය සම්බන්ධයෙන් පරීක්ෂණ පවත්වන කණ්ඩායම් දෙකෙහි අවසන් වාර්තා මෙතෙක් භාර දී නොමැති බව වාර්තා වේ. පසුගිය වසරේ දෙසැම්බර් මාසයේදී අනාවරණය වූ මෙම සිද්ධිය පිළිබඳව ජාතික අධ්යාපන ආයතනය (NIE) මඟින් පත් කළ කමිටුවේ වාර්තාව සහ අපරාධ පරීක්ෂණ දෙපාර්තමේන්තුවේ (CID) වාර්තාව මෙසේ ප්රමාද වී ඇති බව පැවසේ.
මේ පිළිබඳව කළ විමසීමකදී අධ්යාපන හා උසස් අධ්යාපන නියෝජ්ය අමාත්ය ආචාර්ය මධුර සෙනවිරත්න මහතා සඳහන් කළේ ජාතික අධ්යාපන ආයතනයේ විමර්ශන කටයුතු තවමත් අඛණ්ඩව ක්රියාත්මක වන බවයි. එම විමර්ශනවල අතුරු වාර්තාවක් මත පදනම්ව ජාතික අධ්යාපන ආයතනයේ ඉහළ නිලධාරීන් කිහිපදෙනෙකුට එරෙහිව මේ වන විටත් පියවර ගෙන ඇති බවද හෙතෙම වැඩිදුරටත් කියා සිටියේය.
දැනට ජාතික අධ්යාපන ආයතනයේ කමිටුව විසින් මූලික වාර්තාව සකස් කිරීමේ කටයුතු අවසන් අදියරේ පවතින අතර, මින් ඉදිරියට පෙළපොත් සහ මොඩියුල සැකසීමේදී මෙවැනි දෝෂයන් වළක්වා ගැනීමට දැඩි අධීක්ෂණ ක්රමවේදයක් ක්රියාත්මක කරන බවද රජය පවසයි.
