රාමසාන් උත්සවයේ නිමාව සනිටුහන් කරමින් එක්සත් අරාබි එමීර් රාජ්යයේ වෙසෙන මුස්ලිම් බැතිමතුන් අද (මාර්තු 20) උදෑසන ඊදුල් ෆිතර් ආගමික වතාවත්වල නිරත විය. කෙසේ වෙතත්, ආරක්ෂක හේතූන් මත මෙවර විවෘත භූමිවල (Open-air) යාඥා පැවැත්වීම තහනම් කර තිබූ අතර සියලු ආගමික වතාවත් පල්ලි තුළ පමණක් සිදු කිරීමට බලධාරීන් පියවර ගෙන තිබුණි.
පවතින කලාපීය තත්ත්වයන් සහ මහජන ආරක්ෂාව සැලකිල්ලට ගනිමින්, එළිමහන් ඒකරාශී වීම් වෙනුවට යාඥා කටයුතු පල්ලි තුළට පමණක් සීමා කරන ලෙස ඉස්ලාමීය කටයුතු පිළිබඳ දෙපාර්තමේන්තුව උපදෙස් දී තිබුණි. ඩුබායි නගරයේ පල්ලි 900කට අධික සංඛ්යාවක අද උදෑසන 6:40ට යාඥා කටයුතු ආරම්භ වූ අතර, සාජා හි අල් නූර් (Al Noor) පල්ලිය ඇතුළු ප්රධාන පල්ලි රැසකට විශාල බැතිමතුන් පිරිසක් සහභාගී වී සිටියහ. ඩුබායි හි ‘Muezzin Al Freej’ වැඩසටහන හරහා ඊදුල් තක්බීර් (Eid Takbeerat) ගායනා පල්ලි හරහා ප්රචාරය කරමින් බැතිමතුන්ට ආරක්ෂිතව උත්සවය සැමරීමට අවස්ථාව සලසා දී තිබුණි.
යාඥා කටයුතු සඳහා පැමිණෙන බැතිමතුන්ට වේලාසනින් පැමිණෙන ලෙසත්, පල්ලි පාලනාධිකාරිය විසින් ලබා දී ඇති සෞඛ්ය සහ ආරක්ෂක මාර්ගෝපදේශ නිසි ලෙස අනුගමනය කරන ලෙසත් බලධාරීන් දැනුම් දී තිබුණි. මැදපෙරදිග පවතින යුදමය වාතාවරණය මධ්යයේ වුවද, ඉතා භක්තිමත් සහ සාමකාමී අයුරින් මෙවර ඊදුල් ෆිතර් සැමරුම් පැවැත්වීම විශේෂත්වයකි.
