ලොව පුරා පවතින නිවාස හිඟයට සහ ඉදිකිරීම් ක්ෂේත්රයේ ශ්රමික හිඟයට සාර්ථක විසඳුමක් ලෙස රොබෝ තාක්ෂණය යොදාගනිමින් නිවාස තැනීමේ නව ක්රමවේදයක් බ්රිතාන්යයේ AUAR (Automated Architecture) ආයතනය හඳුන්වා දී තිබේ. “සංචාරක ක්ෂුද්ර කර්මාන්තශාලා” (Portable micro-factories) ලෙස හඳුන්වන මෙම පද්ධතිය මගින් නිවසක ලී රාමුව, එනම් බිත්ති, පොළොව සහ වහලයට අවශ්ය කොටස් එක් දිනක් වැනි කෙටි කාලයක් තුළ නිම කිරීමට හැකියාව පවතී.
බ්රිතාන්යයේ ඉදිකිරීම් ක්ෂේත්ර පුහුණු මණ්ඩලයට අනුව 2028 වන විට එම රටට පමණක් අතිරේක ශ්රමිකයින් 250,000ක් අවශ්ය වුවද, දැනට ක්ෂේත්රයට එක්වන පිරිසට වඩා ඉවත් වන පිරිස වැඩි වී තිබේ. AUAR ආයතනයේ සම-නිර්මාතෘ මොලී ක්ලේපූල් පවසන්නේ මෙම ස්වයංක්රීයකරණය මගින් මිනිස් ශ්රමය ප්රතිස්ථාපනය කිරීමක් නොව, පවතින ශ්රම හිඟය පියවා ගැනීමට සහායක් ලබා දෙන බවයි. සාමාන්ය කණ්ඩායමකට සති හතරක් පමණ ගතවන කාර්යයක් මෙම රොබෝ හස්තයක් සහිත ක්ෂුද්ර කර්මාන්තශාලාව හරහා දිනකදී නිම කළ හැකිය.
මෙම තාක්ෂණය භාවිතා කිරීමේදී ගෘහ නිර්මාණ ශිල්පීන්ගේ සැලසුම් කෘත්රිම බුද්ධිය (AI) මගින් විශ්ලේෂණය කර අවශ්ය ලී ප්රමාණය සහ පැනල සංඛ්යාව නිවැරදිව ගණනය කරනු ලබයි. නැව් බහාලුමක් තුළ අසුරා ඕනෑම ඉදිකිරීම් භූමියකට රැගෙන යා හැකි මෙම කර්මාන්තශාලාව මගින් අඩි 22ක් දක්වා දිගු පැනල නිපදවිය හැකි අතර, මහල් හතක් දක්වා උස ගොඩනැගිලි සඳහා අවශ්ය රාමු සැකසීමට ද එය සමත් වේ.
සාම්ප්රදායික ක්රමවේදයට වඩා 30%ක් පමණ ලාභදායී වන මෙම ක්රමය පරිසර හිතකාමී මෙන්ම බලශක්ති කාර්යක්ෂම ක්රමයක් ද වේ. රොබෝ තාක්ෂණයේ පවතින නිරවද්යතාවය නිසා ලී කොටස් අපතේ යාම අවම වන අතර, පැනල එකිනෙකට තදින් සම්බන්ධ වන බැවින් නිවස තුළ තාපය පිටවීම වැළකී විදුලිය පිරිමැසීමට ද උදවු වේ. මෙම නව්යකරණය හරහා ඉදිරි වසර කිහිපය තුළ නිවාස ඉදිකිරීම් ක්ෂේත්රයේ දැවැන්ත පෙරළියක් සිදුවනු ඇතැයි අපේක්ෂා කෙරේ.
