බ්රිතාන්ය අගමැති ශ්රීමත් කීර් ස්ටාමර්, චාගෝස් දූපත් (Chagos Islands) සම්බන්ධයෙන් මුරුසිය සමඟ ඇති කර ගැනීමට ගිය ගිවිසුම අත්හිටුවීමට පියවර ගෙන තිබේ. අමෙරිකානු ජනාධිපති ඩොනල්ඩ් ට්රම්ප් විසින් මෙම ගිවිසුමට එල්ල කළ දැඩි විරෝධය සහ ඒ සඳහා අමෙරිකාවේ නිල අනුමැතිය හිමි නොවීම මීට ප්රධාන හේතුව වී ඇත. මීට පෙර මෙම සැලසුම “දුර්වලකමේ සලකුණක්” ලෙස හඳුන්වමින් ට්රම්ප් එය අවලංගු කරන ලෙස බ්රිතාන්ය රජයෙන් ඉල්ලා සිටියේය.
බ්රිතාන්ය රජයේ නිලධාරීන් පවසන්නේ මෙම ගිවිසුම සම්පූර්ණයෙන්ම අත්හැර නොදැමුවද, ඉදිරි සති කිහිපය තුළ බ්රිතාන්ය පාර්ලිමේන්තුව විසුරුවා හැරීමට පෙර ඒ සඳහා අවශ්ය නීතිමය කටයුතු සම්පූර්ණ කිරීමට කාලය ප්රමාණවත් නොවන බවයි. විශේෂයෙන්ම මැයි මැද භාගයේදී පැවැත්වෙන රජුගේ කතාවටද (King’s Speech) මෙම නව පනත ඇතුළත් නොවනු ඇතැයි අපේක්ෂා කෙරේ. ගිවිසුම ක්රියාත්මක කිරීමට අත්යවශ්ය නීතිමය ලියකියවිලි තවමත් අමෙරිකාවෙන් බ්රිතාන්යයට ලැබී නොමැති බවද වාර්තා වේ.
ඉන්දියන් සාගරයේ පිහිටි මෙම චාගෝස් දූපත් 19 වන සියවසේ සිට බ්රිතාන්ය පාලනය යටතේ පවතී. යෝජිත ගිවිසුම යටතේ එහි ස්වෛරීභාවය මුරුසියට පැවරීමටත්, එහි ඇති ‘ඩියේගෝ ගාර්ෂියා’ (Diego Garcia) ඒකාබද්ධ බ්රිතාන්ය-අමෙරිකානු යුද කඳවුර බදු පදනම මත පවත්වාගෙන යාමටත් තීරණය කර තිබුණි. ඒ සඳහා බ්රිතාන්යය වසරකට පවුම් මිලියන 101ක පමණ මුදලක් ගෙවීමටද නියමිතව තිබුණි. කෙසේ වෙතත්, ඩියේගෝ ගාර්ෂියා යනු දෙරටටම ඉතා වැදගත් උපායමාර්ගික යුද කඳවුරක් බැවින් එහි අනාගතය පිළිබඳව මේ වන විට දැඩි අවධානයක් යොමු වී ඇත.
