සංවිධානාත්මක අපරාධ කල්ලි සාමාජිකයෙකු ලෙස සැලකෙන ‘කොමාන්ඩෝ සාලින්ද’ නමැති සැකකරුව ලබන මාර්තු මස 12 වනදා දක්වා රක්ෂිත බන්ධනාගාරගත කිරීමට කොළඹ මහේස්ත්රාත් අධිකරණය අද (27) නියෝග කළේය. මීට පෙර අපරාධ පරීක්ෂණ දෙපාර්තමේන්තුවේ (CID) රැඳවුම් භාරයේ පසුවූ මොහු, ප්රකට පාතාල නායකයෙකු වූ “ගණේමුල්ල සංජීව” ඝාතනය කිරීමේ සිද්ධියේ ප්රධාන සැකකරුවෙකු ලෙස හඳුනාගෙන තිබේ.
අපරාධ පරීක්ෂණ දෙපාර්තමේන්තුවේ නිලධාරීන් විසින් දැඩි ආරක්ෂක රැකවල් මධ්යයේ සැකකරු අද පස්වරුවේ කොළඹ ප්රධාන මහේස්ත්රාත් අසංග එස්. බෝධරගම මහතාගේ නිල මැදිරිය වෙත ඉදිරිපත් කරනු ලැබීය. එහිදී විමර්ශනවල ප්රගතිය ඇතුළත් වාර්තාවක් ද නිලධාරීන් විසින් අධිකරණයට ඉදිරිපත් කරන ලදී. ඉදිරිපත් වූ කරුණු සලකා බැලූ මහේස්ත්රාත්වරයා සැකකරු ලබන මස 12 වනදා දක්වා රක්ෂිත බන්ධනාගාරගත කිරීමට නියෝග කළේය.
මෙරට පාතාල ලෝකයේ සිදුවූ දරුණුතම ඝාතනයක් සම්බන්ධයෙන් චෝදනා ලබා සිටින මොහුගෙන් සිදුකළ ප්රශ්න කිරීම් හරහා තවත් සංවිධානාත්මක අපරාධ රැසක තොරතුරු අනාවරණය කර ගැනීමට හැකිවනු ඇතැයි පොලිසිය විශ්වාසය පළ කරයි. ආරක්ෂක හේතූන් මත සැකකරු ඉදිරිපත් කිරීමේදී සහ රඳවා තැබීමේදී විශේෂ ආරක්ෂක වැඩපිළිවෙළක් ක්රියාත්මක කිරීමට ද බන්ධනාගාර බලධාරීන් කටයුතු කර තිබේ.
