මැදපෙරදිග කලාපයේ ඇවිළී යන දරුණු යුද ගැටුම් හේතුවෙන් මේ වන විට අවම වශයෙන් දරුවන් 192ක් ජීවිතක්ෂයට පත්ව ඇති බව යුනිසෙෆ් (UNICEF) සංවිධානය නිල වශයෙන් තහවුරු කරයි. මින් දරුවන් 181 දෙනෙකුම ඉරාන ජාතිකයන් වන අතර ඉතිරි පිරිස අතර ලෙබනන් ජාතික දරුවන් 7ක්, ඊශ්රායල ජාතික දරුවන් 3ක් සහ කුවේට් රාජ්යයේ එක් දරුවෙකු ද සිටින බව වාර්තා වේ. ඉරානයේ මිනාබ්හි ‘ෂාජාරේ ටයෙබේ’ ප්රාථමික පාසලට එල්ල වූ ප්රහාරයෙන් පමණක් පාසල් සිසුවියන් 168 දෙනෙකු මරුමුවට පත්වීම මෙම මානුෂීය ව්යසනයේ දරුණුතම අවස්ථාව ලෙස සටහන් වේ.
මේ අතර ඇමෙරිකානු ජනාධිපති ඩොනල්ඩ් ට්රම්ප් විශේෂ මාධ්ය හමුවක් පවත්වමින් කියා සිටියේ ඉරාන හමුදා ඉලක්ක රැසක් සාර්ථකව විනාශ කර අවසන් බවත්, අමෙරිකාව සතු හමුදා ශක්තිය හමුවේ ඉරානයට තවමත් යටත් වීමට අවස්ථාව ඇති බවත්ය. ගෙවුණු පැය 72 තුළ ඉරාන ඉලක්ක 200කට අධික සංඛ්යාවකට ඇමෙරිකානු සහ ඊශ්රායල ප්රහාර එල්ල වී ඇති අතර, ටෙහෙරාන් අගනුවර මර්මස්ථාන රැසක් ගිනිගෙන විනාශ වන අයුරු චන්ද්රිකා ඡායාරූප මගින් ද තහවුරු වී තිබේ. ඉරානය ද සිය ප්රතිප්රහාර ලෙස ටෙල්අවීව් සහ ජෙරුසලම ඉලක්ක කර මිසයිල වර්ෂාවක් එල්ල කර ඇති අතර, මෙම යුද්ධයට එරෙහිව නිව්යෝර්ක් ඇතුළු ලොව ප්රධාන නගර රැසක දැවැන්ත විරෝධතා ද ඇරඹී ඇත.
