ආනයනය කරන ලද ගල්අඟුරු තොගවල පවතින ගුණාත්මකභාවය පිළිබඳ ගැටලු සහ තාක්ෂණික විෂමතා අධ්යයනය කිරීම සඳහා බලශක්ති අමාත්යාංශය මගින් විශේෂඥ කමිටුවක් පත් කර ඇති බව කැබිනට් ප්රකාශක අමාත්ය වෛද්ය නලින්ද ජයතිස්ස මහතා අද (24) ප්රකාශ කළේය. මොරටුව සහ ශ්රී ජයවර්ධනපුර විශ්වවිද්යාලවල විද්වතුන්ගෙන් මෙන්ම අමාත්යාංශ නිලධාරීන්ගෙන් සමන්විත මෙම කමිටුව මගින් අදාළ තාක්ෂණික වාර්තා පරීක්ෂා කර සිදුව ඇති පාඩුව ගණනය කිරීමට නියමිතය.
ගල්අඟුරු ආනයනය කිරීමේදී පවතින ප්රමිතීන්ට අනුව, එහි තාප දාහක අගය (Calorific Value) කිලෝග්රෑමයකට කිලෝ කැලරි 5,900ට වඩා වැඩි විය යුතුය. 5,900ට වඩා අඩු අගයක් ගන්නා තොග ප්රතික්ෂේප වන අතර, 5,900ත් 6,100ත් අතර පවතින තොග සඳහා ස්ථාපිත ක්රියා පටිපාටිය යටතේ දඩ මුදල් පැනවීම සිදු කෙරේ. මේ වන විට පැමිණ ඇති නැව් දහයෙන් (10) අටක (08) ගොඩබෑම් කටයුතු අවසන් කර ඇති අතර, ඉන් නැව් හයක (06) ගල්අඟුරු නියමිත ප්රමිතිය සපුරා නොමැති බව තහවුරු වී ඇත.
ඒ අනුව පළමු නැව සඳහා ඇමෙරිකානු ඩොලර් මිලියන 2.07ක දඩයක් පනවා ඇති අතර, අනෙකුත් නැව් පහ සඳහා ද ඩොලර් 345,000 සිට 510,000 දක්වා වූ විවිධ දඩ මුදල් පනවා තිබේ. පසුගිය පාලන සමයන්හිදී ගල්අඟුරු ආනයනයේදී මෙවැනි ක්රමවත් පරීක්ෂාවන් සිදු නොවූ බවත්, වත්මන් රජය විනිවිදභාවයකින් යුතුව මෙම කටයුතු සිදු කරන බවත් අමාත්යවරයා අවධාරණය කළේය. මෙම කමිටුව මගින් ගල්අඟුරු ප්රවාහනයේදී හෝ ගොඩබෑම්වලදී කිසියම් තාක්ෂණික දෝෂයක් සිදුවී ඇත්ද යන්න පිළිබඳව ද සොයා බලනු ඇත.
