විපක්ෂය මර්දනය කිරීමේ අරමුණින් වර්තමාන රජය හිටපු ජනාධිපති රනිල් වික්රමසිංහ මහතා ඉලක්ක කර ගනිමින් සෘජුවම පහර දීමේ වැඩපිළිවෙළක් ක්රියාත්මක කරන බව එක්සත් ජාතික පක්ෂයේ සභාපති වජිර අබේවර්ධන මහතා පවසයි. එක්සත් ජාතික පක්ෂ නායක රනිල් වික්රමසිංහ මහතාගේ උපදෙස් මත දිවයින පුරා පැවැත්වෙන විශේෂ රැස්වීම් මාලාවේ පළමු අදියර ගාල්ල දිස්ත්රික්කය කේන්ද්ර කර ගනිමින් අද (14) ආරම්භ කරමින් ඔහු මේ බව සඳහන් කළේය.
රනිල් වික්රමසිංහ මහතා මෙරට ආර්ථිකය ගොඩනැගීමට සහ ආයෝජන කලාප පිහිටුවීමට කළ සේවය අද ඇතැම් පිරිසකට අමතක වී ඇති බවත්, ඔහු සිරගත කිරීමට දරන උත්සාහය රජයේ දුර්වලකම බවත් හිටපු අමාත්යවරයා මෙහිදී අවධාරණය කළේය. විශේෂයෙන්ම 2022-2024 අර්බුදකාරී සමයේ පෝලිම් යුගය අවසන් කර රට බංකොලොත්භාවයෙන් මුදා ගැනීමට ඒ මහතා දැක්වූ නායකත්වය ජාත්යන්තරයේ පවා ඇගයීමට ලක්ව ඇති බව ඔහු වැඩිදුරටත් කියා සිටියේය. ගාල්ල දිස්ත්රික්කයේ ආසන සංවිධායකවරුන් සහ පාක්ෂිකයින් රැසකගේ සහභාගීත්වයෙන් පැවැත්වෙන මෙම රැස්වීම් මාලාව හෙට (15) දිනයේද ක්රියාත්මක වීමට නියමිතය.
