උඩරට දුම්රිය මාර්ගයේ පේරාදෙණිය දුම්රිය පාලමේ සහ රඹුක්කන – කඩුගන්නාව අතර මාර්ගයේ ප්රතිසංස්කරණ කටයුතු නිසි සැලසුමකින් තොරව ඇනහිට ඇති බව ශ්රී ලංකා දුම්රිය ස්ථානාධිපති සංගමය චෝදනා කරයි. වර්තමාන දුම්රිය සාමාන්යාධිකාරීවරයාගේ ක්රියාකලාපය මෙම ප්රමාදයට සෘජුවම බලපා ඇති බව ඔවුන් නිවේදනයක් නිකුත් කරමින් පෙන්වා දෙයි.
පේරාදෙණිය දුම්රිය පාලමේ කටයුතු සඳහා ඉංජිනේරුමය කාර්යයන් පිළිබඳ මධ්යම උපදේශක කාර්යාංශය (CECB) සම්බන්ධ වුවද, එම කටයුතු අවශ්ය තාක්ෂණික මට්ටමේ නොමැති බවට දුම්රිය ඉංජිනේරු කමිටුව මත පළ කර තිබේ. මේ හේතුවෙන් පාලමේ වැඩකටයුතු නවතා දමා ඇති අතර, යළිත් වාර්තාවක් කැඳවීමට දෙපාර්තමේන්තුව තීරණය කර ඇත. මේ නිසා 2026 අප්රේල් මාසයේදී මහනුවරට දුම්රිය ධාවනය කිරීමේ රජයේ පොරොන්දුව ඉටුකිරීම අවිශ්වාස සහගත වී තිබේ.
වර්තමාන දුම්රිය සාමාන්යාධිකාරීවරයා රාජ්ය පරිපාලන සේවයේ නිලධාරියෙකු වීම මෙම ගැටලුවලට මුල් වී ඇති බව සංගමය පවසයි. දෙපාර්තමේන්තුව ලාභ ලබන බව පෙන්වීමට දුම්රිය ධාවනය සීමා කර වියදම් අවම කිරීමට ඔහු කටයුතු කරන බවත්, සෙසු වෘත්තීය නිලධාරීන්ගේ අදහස්වලට සවන් නොදීම හේතුවෙන් දුම්රිය මගීන් දැඩි පීඩාවට පත්ව ඇති බවත් ඔවුහු පෙන්වා දෙති.
දුම්රිය සේවය කඩිනමින් යථා තත්ත්වයට පත් කිරීම සඳහා විශ්රාමික දුම්රිය ඉංජිනේරුවරුන්ගෙන් සහ හිටපු සාමාන්යාධිකාරීවරුන්ගෙන් සමන්විත විශේෂ කමිටුවක් පත් කරන ලෙස එම සංගමය රජයෙන් ඉල්ලා සිටියි.
