ගෝලීය බලශක්ති වෙළෙඳපොළේ ස්ථාවරත්වය ආරක්ෂා කිරීමේ අරමුණින්, දැනට මුහුදේ යාත්රා කරමින් පවතින නෞකාවල ඇති රුසියානු බොරතෙල් සහ ඛනිජ තෙල් මිලදී ගැනීමට වෙනත් රටවලට අවසර ලබා දීමට ඇමෙරිකාව පියවර ගෙන තිබේ. මැදපෙරදිග යුදමය වාතාවරණය හමුවේ ලෝක වෙළෙඳපොළේ බොරතෙල් මිල ශීඝ්රයෙන් ඉහළ යාම පාලනය කිරීම සඳහා මෙම තීරණය ගෙන ඇති බව විදෙස් මාධ්ය වාර්තා කරයි.
මෙම විශේෂ සහනය අප්රේල් මස 11 වැනිදා දක්වා පමණක් වලංගු වන පරිදි ලබා දී ඇත. හෝමූස් සමුද්ර සන්ධියේ නෞකාවලට ප්රහාර එල්ල වීම සහ ඉරාකයේ බස්රා වරායේ අපනයන කටයුතු ඇණහිටීම නිසා බොරතෙල් බැරලයක මිල ඩොලර් 100 සීමාව ඉක්මවා ගොස් ඇති පසුබිමක, බලශක්ති සැපයුම අඛණ්ඩව පවත්වා ගැනීමට ඇමෙරිකාව ගත් මෙම තීරණය ලෝක ආර්ථිකයට තීරණාත්මක වනු ඇතැයි විශ්වාස කෙරේ.
රුසියාවට එරෙහි සම්බාධක පවතින අතරතුර මෙලෙස සහනයක් ලබා දීමෙන් පැහැදිලි වන්නේ වත්මන් මැදපෙරදිග අර්බුදය ගෝලීය බලශක්ති ක්ෂේත්රය වෙත එල්ල කර ඇති දැඩි බලපෑමයි. මෙම පියවර හරහා ඉදිරි සති කිහිපය තුළ ඉන්ධන මිල තවදුරටත් ඉහළ යාම යම් දුරකට පාලනය වනු ඇතැයි අපේක්ෂා කෙරේ.
