ඇමෙරිකාවේ ඇරිසෝනා ප්රාන්තයේ ටක්සන් (Tucson) නුවර පදිංචිව සිටි 84 හැවිරිදි නැන්සි ගුත්රි (Nancy Guthrie) මහත්මිය අතුරුදහන් වූ පෙබරවාරි 01 වන දිනට පෙර දින රාත්රියේ ඇය ගමන් කළ අවසන් වීඩියෝ දර්ශන විමර්ශන නිලධාරීන් විසින් සොයාගෙන තිබේ. ඇය සිය නිවසේ සිට කිසියම් පිරිසක් විසින් පැහැරගෙන යන්නට ඇති බවට සැකකෙරෙන අතර මෙම නව වීඩියෝ දර්ශන පරීක්ෂණ සඳහා ඉතා වැදගත් වනු ඇතැයි විශ්වාස කෙරේ.
පීමා කවුන්ටි (Pima County) ෂෙරිෆ් දෙපාර්තමේන්තුවට අනුව නැන්සි ගුත්රි මහත්මිය අතුරුදහන් වූ රාත්රියේ ඇය උබර් (Uber) රථයකින් ගමන් කර ඇති බව අනාවරණය වී තිබේ. අදාළ රථයේ රියදුරුගෙන් පොලිසිය දීර්ඝ ලෙස ප්රශ්න කර ඇති අතර ඔහු සතුව තිබූ වාහනය අභ්යන්තරයේ පටිගත වූ සියලුම වීඩියෝ දර්ශන පොලිසිය වෙත භාර දී ඇත. කෙසේ වෙතත් එම රියදුරුගෙන් ඇය පිළිබඳව කිසිදු සැකකටයුතු තොරතුරක් මෙතෙක් අනාවරණය වී නොමැති බව විදෙස් මාධ්ය වාර්තා කරයි.
නැන්සි ග්රේස් (Nancy Grace) ගේ අපරාධ විමර්ශන වැඩසටහන මගින් පෙන්වා දෙන්නේ ඇය අතුරුදහන් වූ රාත්රියේ ඇනී සහ තෝමසෝ සියොනි (Annie & Tommaso Cioni) යන අයගේ නිවසේ පැවති රාත්රී භෝජන සංග්රහයකට ඇය සහභාගී වී ඇති බවයි. ඇය එදින රාත්රියේ සිය නිවසට පැමිණීමෙන් පසු කිසියම් සිදුවීමක් වී ඇති බවට පොලිසිය සැක කරයි. ඇයගේ නිවස ඉදිරිපිට මේ වන විට ඇය වෙනුවෙන් සමරු සැමරුම් ඉදි කර ඇති අතර ඇය සොයා ගැනීමට මහජන සහය තවදුරටත් අපේක්ෂා කෙරේ.
