මැද පෙරදිග කලාපය භාර ඇමරිකානු මධ්යම විධානයේ (CENTCOM) අණදෙන නිලධාරී අද්මිරාල් බ්රැඩ් කූපර් (Brad Cooper) අද (මාර්තු 04) ප්රකාශ කළේ, ඉරානයට එරෙහිව දියත් කර ඇති “ඔපරේෂන් එපික් ෆියුරි” මෙහෙයුම සැලසුම් කළ කාලසටහනට වඩා වේගයෙන් (Ahead of schedule) ඉදිරියට යන බවයි. රොයිටර් පුවත් සේවය වාර්තා කරන පරිදි, මෙහෙයුම ආරම්භ වී දින පහක් ගත වන විට ඉරානය තුළ පිහිටි උපායමාර්ගික ඉලක්ක 2,000කට අධික සංඛ්යාවකට ප්රහාර එල්ල කිරීමට ඇමරිකානු සහ ඊශ්රායල හමුදා සමත්ව තිබේ. මෙම ප්රහාරවල පළමු පැය 24 තුළ එල්ල කළ ප්රහාරවල ප්රමාණය, 2003 වසරේ ඉරාක යුද්ධය ආරම්භයේදී එල්ල කළ “Shock and Awe” මෙහෙයුමට වඩා දෙගුණයකින් වැඩි බව ද ඔහු අනාවරණය කළේය.
ඉරානයේ ගුවන් ආරක්ෂක පද්ධති සහ මිසයිල දියත් කිරීමේ මධ්යස්ථාන මේ වන විට දැඩි ලෙස අඩපණ කර ඇති බවත්, ඉරාන නාවික හමුදාවට අයත් යානා 17ක් මුහුදුබත් කර ඇති බවත් CENTCOM වාර්තාවල දැක්වේ. මේ අතර, ඊශ්රායලය විසින් තෙහෙරාන් අගනුවර පිහිටි ‘මීන්සාදෙහෙයි’ (Minzadehei) භූගත න්යෂ්ටික පර්යේෂණ මධ්යස්ථානය සහ රජයේ ප්රධාන ගොඩනැගිලි ඉලක්ක කර ගනිමින් දැවැන්ත ප්රහාර මාලාවක් අද අලුයම දියත් කරන ලදී. මෙයට ප්රතිචාර වශයෙන් ඉරානය විසින් ගල්ෆ් කලාපයේ ඇමරිකානු කඳවුරු පවත්වාගෙන යන රටවල් වෙත මිසයිල වර්ෂාවක් එල්ල කර ඇති අතර, කුවේට් සහ සෞදි අරාබියේ පිහිටි ඇමරිකානු රාජ්ය තාන්ත්රික මධ්යස්ථාන ද ඩ්රෝන ප්රහාරවලට ලක්ව තිබේ. ජනාධිපති ඩොනල්ඩ් ට්රම්ප් පවසා ඇත්තේ මෙම මෙහෙයුම මගින් ඉරානයේ යුද ශක්තිය සම්පූර්ණයෙන්ම විනාශ කරන බවයි.
