ඉරානය සමඟ පවතින යුදමය වාතාවරණය තවදුරටත් දරුණු අතට හැරීමත් සමඟ, මැදපෙරදිග කලාපයේ සිය හමුදා බලය ශක්තිමත් කිරීම සඳහා අමතර නාවික භටයින් (Marines) 2,200ක පිරිසක් යෙදවීමට ඇමරිකාව පියවර ගෙන තිබේ. අල්ජසීරා පුවත් සේවයට අනුව, මෙම විශේෂ භට පිරිස නාවික යුද යාත්රා තුනක් මගින් කලාපය වෙත පිටත් කර හැරීමට කටයුතු සූදානම් කර ඇත.
මෙම භට කණ්ඩායම ජපානයේ ඔකිනාවා (Okinawa) හි පිහිටි ඇමරිකානු නාවික කඳවුරේ සිට මැදපෙරදිග වෙත යොමු කෙරේ. හදිසි ඉවත් කිරීමේ මෙහෙයුම් (Evacuation missions) මෙන්ම මුහුදේ සිට ගොඩබිමට ප්රහාර එල්ල කරමින් ගොඩබෑමේ මෙහෙයුම් (Amphibious landing operations) සිදු කිරීමේ විශේෂ පුහුණුව ලත් ප්රහාරක ඒකකයක් ලෙස මොවුන් සැලකේ. කලාපය තුළ පවතින යුද මෙහෙයුම්වලට සෘජුව සහාය දැක්වීම මෙම පියවරේ ප්රධාන අරමුණයි.
ඉරානය විසින් ඇමරිකානු කඳවුරුවලට එල්ල කරන ප්රහාර සහ හෝමූස් සමුද්ර සන්ධියේ පවතින නොසන්සුන්කාරී තත්ත්වය හමුවේ, සිය අවශ්යතාවන් සහ මිත්ර පාර්ශවයන් ආරක්ෂා කර ගැනීම සඳහා ඇමරිකාව මෙලෙස සිය යුද ශක්තිය ප්රදර්ශනය කරමින් සිටී. මෙම නව හමුදා යෙදවීමත් සමඟ මැදපෙරදිග කලාපය තුළ පවතින යුදමය පීඩනය තවදුරටත් ඉහළ යනු ඇති බව විශ්ලේෂකයෝ පෙන්වා දෙති.
