ඇමරිකා එක්සත් ජනපදයෙන් පිටුවහල් කිරීමෙන් අනතුරුව තම මව් රටවලට වෙනුවට අප්රිකානු රාජ්යයක් වන එස්වාටිනි වෙත යොමු කරන ලද කියුබාව, ජැමෙයිකාව සහ යේමනය යන රටවලට අයත් පුද්ගලයින් තිදෙනෙකු එස්වාටිනි රජයට එරෙහිව අප්රිකානු සංගමයේ මානව හිමිකම් ආයතනය හමුවේ නඩුවක් ගොනු කර තිබේ. තමාව මෙලෙස රඳවා තබා ගැනීම නීති විරෝධී බවත් එය සිය මානුෂීය අයිතිවාසිකම් උල්ලංඝනය කිරීමක් බවත් පවසමින් ඔවුන් මෙම නීතිමය පියවර ගෙන ඇත.
මෙම පිරිස අතරින් කියුබානු සහ යේමන ජාතිකයින් දෙදෙනා මාස අටක කාලයක සිට එස්වාටිනි හි බන්ධනාගාරගතව සිටින අතර, ජැමෙයිකානු ජාතික ඕවිල් එටෝරියා (Orville Etoria) පසුගිය සැප්තැම්බරයේදී යළි සිය මව් රටට යොමු කර තිබේ. ඇමරිකානු බලධාරීන් මොවුන් “භයානක අපරාධකරුවන්” ලෙස හැඳින්වුවද, මොවුන් ඇමරිකාව තුළ සිදුකළ වැරදි සඳහා දැනටමත් දඬුවම් විඳ අවසන් බව ඔවුන්ගේ නීතිඥයෝ පෙන්වා දෙති. ඩොනල්ඩ් ට්රම්ප් පරිපාලනය විසින් ක්රියාත්මක කරන සමූහ පිටුවහල් කිරීමේ වැඩසටහන යටතේ මෙලෙස තෙවන පාර්ශවීය රටවලට පුද්ගලයින් යොමු කිරීම සිදුකරන අතර, ඒ සඳහා ඇමරිකාව එස්වාටිනි රජයට ඩොලර් මිලියන 5.1ක මුදලක් ගෙවීමට එකඟ වී ඇති බව වාර්තා වේ.
පිටුවහල් කරන ලද පුද්ගලයින් එස්වාටිනි තුළ කිසිදු වරදක් කර නොමැති වුවද ඔවුන්ව දින නියමයකින් තොරව රඳවා තබාගෙන සිටින බවත්, අවම වශයෙන් සිය නීතිඥවරුන් හමුවීමට පවා අවස්ථාව ලබා නොදෙන බවත් ගෝලීය උපායමාර්ගික නඩු පැවරීමේ කවුන්සිලය (Global Strategic Litigation Council) චෝදනා කරයි. එක් රැඳවියෙකු පසුගිය වසරේ දින 30ක උපවාසයක නිරත වීම හේතුවෙන් ඔහුගේ ශරීරයේ ඉන්ද්රියයන් අක්රිය වීමේ ලක්ෂණ පවා පෙන්නුම් කර ඇති බව වාර්තා වේ.
කෙසේ වෙතත්, එස්වාටිනි රජය මෙම චෝදනා ප්රතික්ෂේප කරමින් පවසන්නේ මොවුන් බන්ධනාගාරගත කර නොමැති බවත්, රාජ්ය තාන්ත්රික කටයුතු නිමවන තෙක් ආරක්ෂිත පරිසරයක රඳවා සිටින බවත්ය. ඇමරිකාව මෙලෙස තෙවන පාර්ශවීය රටවලට පිටුවහල් කිරීම සඳහා එස්වාටිනි වලට අමතරව ඝානාව, රුවන්ඩාව, දකුණු සුඩානය සහ උගන්ඩාව වැනි රටවල් සමඟ ද ගිවිසුම්ගතව ඇති බව පෙනී යයි.
