ඉරානය සහ ඇමරිකානු-ඉශ්රායල පාර්ශවයන් අතර පවතින යුද්ධය වඩාත් දරුණු අතට හැරෙමින් පවතින අතර, ඉරාකයේ බැග්ඩෑඩ් නුවර පිහිටි ඇමරිකානු තානාපති කාර්යාලය ඉලක්ක කර ගනිමින් ඊයේ රාත්රියේ දැවැන්ත ඩ්රෝන සහ රොකට් ප්රහාර මාලාවක් එල්ල විය. ඉරාක ආරක්ෂක අංශ පවසන පරිදි මෙය යුද්ධය ආරම්භ වූ දා සිට එල්ල වූ දරුණුතම ප්රහාරය වන අතර, තානාපති කාර්යාලය සහ රජයේ ගොඩනැගිලි පිහිටි දැඩි ආරක්ෂිත “හරිත කලාපයේ” (Green Zone) පිහිටි සුඛෝපභෝගී හෝටලයකට ද ඩ්රෝන ප්රහාරයක් හේතුවෙන් ගිනි ගෙන තිබේ. මේ අතර එක්සත් අරාබි එමීර් රාජ්යයේ අබුඩාබි නුවරට පතිත වූ මිසයිල සුන්බුන් හේතුවෙන් පාකිස්තාන ජාතිකයෙකු ජීවිතක්ෂයට පත්ව ඇති බව එරට රජයේ නිලධාරීන් තහවුරු කර ඇත.
ඉශ්රායලය විසින් ලෙබනනය වෙත එල්ල කරන ප්රහාර අඛණ්ඩව ක්රියාත්මක වන පසුබිමක, එහි පවතින “ගැඹුරු කනස්සල්ලට කරුණක් වූ” මානුෂීය තත්ත්වය සැලකිල්ලට ගෙන වහාම සාම සාකච්ඡා ආරම්භ කරන ලෙස කැනඩාව, ප්රංශය, ජර්මනිය, ඉතාලිය සහ බ්රිතාන්යය යන රටවල් දෙපාර්ශ්වයෙන්ම ඉල්ලා සිටියි. මේ අතර ඇමරිකානු ජනාධිපති ඩොනල්ඩ් ට්රම්ප් විසින් බ්රිතාන්ය අගමැති කීර් ස්ටාර්මර් වෙත එල්ල කරන ලද විවේචන හමුවේ ෆින්ලන්ත ජනාධිපති ඇලෙක්සැන්ඩර් ස්ටබ් බ්රිතාන්යය වෙනුවෙන් පෙනී සිට ඇත. යුද්ධය සම්බන්ධයෙන් යුරෝපීය මිත්ර රටවල් දක්වන මන්දගාමී සහයෝගය පිළිබඳව ජනාධිපති ට්රම්ප් වඩ වඩාත් කලකිරීමට පත්ව සිටින බව ද වාර්තා වේ.
