ලබන මාර්තු 15 වනදා පැවැත්වීමට නියමිත 98 වන ඔස්කාර් සම්මාන උළෙල (Academy Awards) වෙනුවෙන් හොලිවුඩයේ ඩොල්බි රංග පීඨය (Dolby Theatre) අවට ආරක්ෂාව දැඩි කිරීමට ඇමරිකානු ෆෙඩරල් විමර්ශන කාර්යාංශය (FBI) සහ ලොස් ඇන්ජලීස් පොලිස් දෙපාර්තමේන්තුව (LAPD) පියවර ගෙන තිබේ. සම්මාන උළෙල ඉලක්ක කරගත් නිශ්චිත තර්ජනයක් මෙතෙක් වාර්තා වී නොමැති වුවද, පවතින ගෝලීය තත්ත්වය හමුවේ ආරක්ෂක අංශ මෙලෙස දැඩි සෝදිසියෙන් පසුවෙයි.
ඇමරිකානු බලධාරීන්ට ලැබී ඇති තොරතුරුවලට අනුව, ඉරානය විසින් කැලිෆෝනියා ප්රාන්තයට ඩ්රෝන ප්රහාර එල්ල කිරීමේ හැකියාවක් පවතින බවට FBI ආයතනය අනතුරු අඟවා ඇත. ඔස්කාර් උළෙල ලොව පුරා ඉහළ අවධානයක් දිනාගන්නා සුවිශේෂී අවස්ථාවක් බැවින්, ඕනෑම අනපේක්ෂිත තත්ත්වයකට මුහුණ දීම සඳහා ආරක්ෂක විධිවිධාන උපරිම කර ඇති බව විධායක නිෂ්පාදක රාජ් කපූර් ප්රකාශ කළේය.
මෙවර සම්මාන උළෙලේ නිවේදකයා ලෙස කටයුතු කරන ප්රකට රූපවාහිනී තරුවක් වන කොනන් ඕබ්රයන් (Conan O’Brien) සඳහන් කළේ, වර්තමානයේ පවතින යථාර්ථයන් පිළිබඳව අවබෝධයෙන් යුතුව ප්රේක්ෂකයන් පිනවීමට තමන් සූදානම් බවයි. දැනටමත් ඩොල්බි රංග පීඨය අවට පෞද්ගලික ආරක්ෂක කණ්ඩායම් සහ ෆෙඩරල් ඒජන්තවරුන් යොදවා ඇති අතර, උත්සවයට සහභාගී වන සුපිරි තරු සහ අමුත්තන්ගේ ආරක්ෂාව තහවුරු කිරීමට සියලු පියවර ගෙන තිබේ.
