ඇමරිකානු ජනාධිපති ඩොනල්ඩ් ට්රම්ප් විසින් කැනේඩියානු භාණ්ඩ මත පනවා ඇති ආනයනික බදු (Tariffs) අහෝසි කිරීම සඳහා වන යෝජනාවක් ඇමරිකානු නියෝජිත මන්ත්රී මණ්ඩලයේදී (US House of Representatives) අද සම්මත විය. පක්ෂ විපක්ෂ බෙදීමක් සහිතව පැවති මෙම ඡන්ද විමසීමේදී පක්ෂව ඡන්ද 219ක් සහ විපක්ෂව ඡන්ද 211ක් ලැබුණු අතර, රිපබ්ලිකන් පාක්ෂික මන්ත්රීවරුන් හයදෙනෙකු සිය පක්ෂයේ මතයට එරෙහිව ඩිමොක්රටික් පාක්ෂිකයන් සමඟ එක්ව මෙම යෝජනාවට සහාය පළ කිරීම විශේෂත්වයකි. කෙසේ වෙතත්, මෙම තීරණය ක්රියාත්මක වීමට නම් එය ඇමරිකානු සෙනෙට් මණ්ඩලයෙන් ද සම්මත වී අවසානයේ ජනාධිපති ට්රම්ප් විසින් අත්සන් කළ යුතු අතර, ඔහු ඊට එකඟ නොවනු ඇති බැවින් මෙය බොහෝ දුරට සංකේතවත් (Symbolic) ජයග්රහණයක් පමණක් වනු ඇති බව දේශපාලන විචාරකයෝ පවසති.
මෙම ඡන්ද විමසීම සිදුවන අවස්ථාවේදී ජනාධිපති ට්රම්ප් සිය ‘Truth Social’ ගිණුම හරහා අනතුරු ඇඟවීමක් කරමින් කියා සිටියේ, මෙම බදු පියවරට එරෙහිව ඡන්දය දෙන ඕනෑම රිපබ්ලිකන් මන්ත්රීවරයෙකුට ඉදිරි මැතිවරණවලදී එහි දරුණු ප්රතිවිපාක විඳීමට සිදුවනු ඇති බවයි. බදු මඟින් ඇමරිකාවේ ආර්ථික සහ ජාතික ආරක්ෂාව තහවුරු වී ඇති බව ඔහුගේ මතයයි. එහෙත් යෝජනාව ඉදිරිපත් කළ ඩිමොක්රටික් මන්ත්රී ග්රෙගරි මීක්ස් පවසන්නේ ට්රම්ප් බදු පද්ධතිය සිය මිත්ර රටවලට එරෙහි “ආයුධයක්” ලෙස භාවිත කරන බවත්, එමඟින් ඇමරිකානු පාරිභෝගිකයන්ට බඩු මිල ඉහළ යාම හරහා දැඩි පීඩනයක් එල්ල වන බවත්ය.
මෙම පනත් කෙටුම්පත දැන් රිපබ්ලිකන් බහුතරයක් සහිත සෙනෙට් මණ්ඩලය වෙත යොමු කෙරේ. මෙවැනි තත්ත්වයක් තුළ මෙක්සිකෝව, බ්රසීලය සහ අනෙකුත් රටවල් මත පනවා ඇති බදු ද ඉවත් කිරීමට ඩිමොක්රටික් පාර්ශවය ඉදිරියේදී සූදානම් වන බව දන්වා ඇත. මේ අතර, ජනාධිපතිවරයෙකුට මෙලෙස බදු පැනවීමට ඇති නීතිමය බලය සම්බන්ධයෙන් ඇමරිකානු ශ්රේෂ්ඨාධිකරණය ද ඉදිරියේදී තීන්දුවක් ලබා දීමට නියමිතව තිබීම මේ වන විට මුළු ලෝකයේම අවධානයට ලක්ව ඇති කරුණකි.
