අමෙරිකාව සහ ඉරානය අතර පවතින යුදමය තත්ත්වය සති කිහිපයක් වැනි කෙටි කාලයක් ඇතුළත අවසන් කිරීමට අපේක්ෂා කරන බව අමෙරිකානු රාජ්ය ලේකම් මාර්කෝ රුබියෝ මහතා ප්රකාශ කර තිබේ. ප්රංශයේ පැවැත්වෙන ‘G7’ රටවල නියෝජිත හමුවට සහභාගී වෙමින් ඔහු අවධාරණය කළේ, ඉරානය වෙත ගොඩබිම් ආක්රමණයක් (Ground Invasion) සිදු නොකරම අමෙරිකාවේ යුදමය අරමුණු සපුරා ගැනීමට හැකි වනු ඇති බවයි. මෙම මෙහෙයුම මාස ගණනාවක් පුරා ඇදී නොයන බවත්, නුදුරු සති කිහිපය තුළ එය සාර්ථකව නිම කිරීමට කටයුතු කරන බවත් ඔහු වැඩිදුරටත් සඳහන් කළේය.
මෙහිදී හෝමුස් සමුද්ර සන්ධියේ ආරක්ෂාව සහ ඉදිරි වෙළඳ කටයුතු පිළිබඳව ද විශේෂ අවධානයක් යොමු වී ඇත. යුද්ධය අවසන් වූ පසුව පවා ඉරානය විසින් මෙම මුහුදු මාර්ගය හරහා ගමන් කරන නෞකා සඳහා ‘නාවික ගාස්තු’ පැනවීමට ඇති හැකියාව පිළිබඳව ‘G7’ නියෝජිතයෝ සිය කනස්සල්ල පළ කර තිබේ. ඒ සම්බන්ධයෙන් අදහස් දක්වමින් රුබියෝ මහතා කියා සිටියේ, හෝමුස් සමුද්ර සන්ධිය හරහා නිදහස් නාවික ගමනාගමනය තහවුරු කර ගැනීමට නම් යුරෝපීය සහ ආසියානු රටවල් අමෙරිකාවේ උත්සාහයන්ට සෘජු සහයෝගය ලබා දිය යුතු බවයි. ලෝක ආර්ථිකයට තීරණාත්මක බලපෑමක් එල්ල කරන මෙම මුහුදු සන්ධියේ ආරක්ෂාව තහවුරු කර ගැනීම සියලුම වෙළඳ රටවල වගකීමක් බව ද මෙහිදී අවධාරණය කෙරිණි.
