ලොව ප්රධානතම තෙල් ප්රවාහන මාර්ගයක් වන හෝමූස් සමුද්ර සන්ධිය වහාම විවෘත කරන ලෙස අමෙරිකානු ජනාධිපති ඩොනල්ඩ් ට්රම්ප් ලබාදුන් පැය 48ක අවසන් නිවේදනය ඉරානය විසින් දැඩි පිළිකුලෙන් යුතුව ප්රතික්ෂේප කර තිබේ. ට්රම්ප් සිය ‘Truth Social’ ගිණුම හරහා අනතුරු අඟවා තිබුණේ නියමිත කාලය තුළ හෝමූස් සමුද්ර සන්ධිය විවෘත කිරීමට හෝ එකඟතාවයකට පැමිණීමට ඉරානය අපොහොසත් වුවහොත්, එරට යටිතල පහසුකම් ඉලක්ක කර ගනිමින් දැවැන්ත ප්රහාර එල්ල කරන බවයි. “නිරය ම මිහිපිටට උදාවනු ඇත” (All hell will rain down) යනුවෙන් ට්රම්ප් කළ මෙම තර්ජනයත් සමඟ මැදපෙරදිග කලාපයේ යුදමය උණුසුම අතිශය තීරණාත්මක මට්ටමකට පැමිණ ඇත.
අමෙරිකානු ජනාධිපතිවරයාගේ මෙම ප්රකාශයට ප්රතිචාර දක්වමින් ඉරාන මධ්යම යුද මූලස්ථානයේ ජෙනරාල් අලි අබ්දුල්ලාහි අලිඅබාදි සඳහන් කර ඇත්තේ, ට්රම්ප්ගේ මෙම තර්ජනය “අසරණ, අසමබර සහ මෝඩ ක්රියාවක්” බවයි. අමෙරිකානු ප්රහාර එල්ල වුවහොත් ඉරානය සතු සියලු ශක්තිය යොදවා ප්රතිප්රහාර දෙන බවත්, එවිට නිරයේ දොරටු විවෘත වන්නේ අමෙරිකාවට බවත් ඔහු අවධාරණය කළේය. සති හයක් පුරා ඇදී යන මෙම ගැටුම්කාරී වාතාවරණය හමුවේ හෝමූස් සමුද්ර සන්ධිය වසා තැබීම හේතුවෙන් ගෝලීය තෙල් මිල ද සීග්රයෙන් ඉහළ යමින් පවතින බව වාර්තා වේ.
මේ අතර, පකිස්ථානය, තුර්කිය සහ ඊජිප්තුව වැනි රටවල් මැදිහත් වී දෙපාර්ශවය සාකච්ඡා මේසයට ගෙන ඒමට උත්සාහ කළ ද, ඉරානය පවසන්නේ අමෙරිකාවේ තර්ජන හමුවේ තමන් කිසිසේත් යටත් නොවන බවයි. අමෙරිකානු ප්රහාරක යානා දෙකක් පසුගියදා ඉරාන ආරක්ෂක අංශ විසින් බිම හෙළීමත් සමඟ තත්ත්වය තවත් උග්ර වී තිබේ. එළඹෙන අප්රේල් 6 වැනිදා සඳුදා රාත්රිය වන විට මෙම කාලසීමාව අවසන් වීමට නියමිත අතර, ලෝක ප්රජාව මහත් නොසන්සුන්තාවයකින් යුතුව ඉදිරි පැය කිහිපය දෙස බලා සිටී.
