ඇමෙරිකාව සහ ඉරානය අතර පවතින යුද්ධය තවදුරටත් උත්සන්න කරමින්, හෝමුස් සමුද්ර සන්ධිය අසලදී ඇමෙරිකානු ‘USS ඒබ්රහම් ලින්කන්’ (USS Abraham Lincoln) ගුවන් යානා වාහක නෞකාවට මිසයිල ප්රහාර එල්ල කළ බව ඉරාන නාවික හමුදාව අද (2026 මාර්තු 25) ප්රකාශ කළේය. අද පස්වරුවේ නිකුත් වූ වාර්තාවලට අනුව, ඉරාන හමුදාව විසින් දේශීයව නිෂ්පාදිත ‘කාදර්’ (Qader) වර්ගයේ ක්රූස් මිසයිල මෙම ප්රහාරය සඳහා භාවිතා කර ඇති අතර, එමගින් නෞකාවට සිය පිහිටීම වෙනස් කිරීමට බල කර ඇති බව ඉරාන මාධ්ය වාර්තා කරයි.
ඉරානයේ ෆාර්ස් (Fars) පුවත් ඒජන්සිය විසින් මෙම ප්රහාරය දැක්වෙන බව පැවසෙන වීඩියෝවක් ද ප්රසිද්ධ කර ඇති අතර, එහි අහසට මිසයිල විදින දර්ශන සහ ප්රබල පිපිරුම් හඬවල් අඩංගු වේ. කෙසේ වෙතත්, ඇමෙරිකානු මධ්යම විධානය (CENTCOM) මීට පෙර මෙවැනිම චෝදනා ප්රතික්ෂේප කර තිබූ අතර, ඔවුන් පවසා සිටියේ ඉරාන මිසයිල නෞකාව අසලටවත් පැමිණීමට පෙර විනාශ කළ බවයි. ජනාධිපති ඩොනල්ඩ් ට්රම්ප් ද ඊයේ ප්රකාශ කළේ ඉරානය විසින් එල්ල කළ මිසයිල 101ක්ම ඇමෙරිකානු ආරක්ෂක පද්ධති මගින් සාර්ථකව විනාශ කළ බවයි.
මෙම ප්රහාරය එල්ල වී ඇත්තේ ඇමෙරිකාව විසින් ඉරානය වෙත කරුණු 15කින් යුත් සටන් විරාම සැලැස්මක් ඉදිරිපත් කර ඇති පසුබිමක වීම විශේෂත්වයකි. ඉරානය පවසන්නේ ඇමෙරිකාව සමඟ සාකච්ඡා කිරීමට තමන්ට අවශ්යතාවයක් නොමැති බවත්, තම මුහුදු සීමාවට ඇතුළු වන ඕනෑම සතුරු නෞකාවකට ප්රහාර එල්ල කරන බවත්ය. මෙම සිදුවීමත් සමඟ මැදපෙරදිග කලාපයේ නාවික යුද්ධය අලුත් වටයකින් ඇවිළී යාමේ අවදානමක් මතුව තිබේ.
