ඉරානය සමඟ පවතින යුදමය වාතාවරණය ඉතා ඉක්මනින් අවසන් වනු ඇති බවට ඇමරිකානු ජනාධිපති ඩොනල්ඩ් ට්රම්ප් යළිත් විශ්වාසය පළ කර තිබේ. ෆ්ලොරිඩාහිදී සිය පක්ෂ සගයන් ඇමතීමෙන් අනතුරුව පැවති මාධ්ය හමුවකදී ඔහු කියා සිටියේ ඇමරිකානු හමුදා දැනටමත් බොහෝ ජයග්රහණ අත්පත් කරගෙන ඇති නමුත් “තවම ඇති තරම් දිනා නොමැති” බවයි. මෙම තර්ජනය සදහටම අවසන් කිරීම සඳහා වඩාත් අධිෂ්ඨානශීලීව ඉදිරියට යන බව පැවසූ ඔහු, පසුගිය දින දහයකට පෙර ආරම්භ වූ මෙම යුද්ධය හුදෙක් “කුඩා සංචාරයක්” (A little excursion) ලෙස ද හඳුන්වා දුන්නේය.
පසුගිය සතියේ එල්ල වූ ඇමරිකා-ඉශ්රායල ඒකාබද්ධ ප්රහාරයකින් ඉරාන උත්තරීතර නායක අලි කමේනි මියගිය අතර ඔහුගේ පුත් මොජ්ටාබා කමේනි නව නායකයා ලෙස පත් කිරීම පිළිබඳව ද ට්රම්ප් සිය අකමැත්ත පළ කළේය. එම තීරණය ඉරානයට තවදුරටත් ගැටලුකාරී වනු ඇති බව පැවසූ ඔහු, වෙනිසියුලාවේ සහ ඉරාකයේ අතීත අත්දැකීම් උදාහරණයට ගනිමින් ඉරානයේ අභ්යන්තර පාලනය පිළිබඳව සිය අදහස් ඉදිරිපත් කළේය. විශේෂයෙන්ම වෙනිසියුලාවේ බලශක්ති සම්පත් කළමනාකරණය කරන ආකාරය ගැන ඔහු මෙහිදී විශේෂ අවධානයක් යොමු කර තිබුණි.
රුසියානු ජනාධිපති ව්ලැඩිමීර් පුටින් සමඟ ද ඉරාන යුද්ධය පිළිබඳව සාකච්ඡා කළ බව ට්රම්ප් මෙහිදී තහවුරු කළේය. ඇමරිකාව මෙතරම් ඉක්මනින් සාර්ථකත්වය අත්පත් කර ගැනීම ගැන පුටින් මහතා පුදුමයට පත්ව සිටින බව පැවසූ ඔහු, ඉශ්රායලය සමඟ එක්ව එල්ල කළ ඒකාබද්ධ ප්රහාර සහ B-2 බෝම්බ හෙලන යානා මගින් ලබාගත් සාර්ථකත්වය පෙර නොවූ විරූ එකක් බව අවධාරණය කළේය. ඉරානය සති කිහිපයක් ඇතුළත න්යෂ්ටික අවියක් නිෂ්පාදනය කිරීමට සූදානම්ව සිටි බවත්, තම යුද මෙහෙයුම් මගින් එය වළක්වා ගත් බවත් ඔහු වැඩිදුරටත් කියා සිටියේය.
