ඇමෙරිකාව සහ ඉරානය අතර පවතින යුද්ධය ආරම්භ වී සති තුනහමාරක් ගත වී ඇති පසුබිමක, මෙම මෙහෙයුම අවසන් කිරීම (Winding down) පිළිබඳ ඉඟි පළ කිරීමට ජනාධිපති ඩොනල්ඩ් ට්රම්ප් කටයුතු කර තිබේ. අද (2026 මාර්තු 25) දිනැති පුවත් වාර්තාවලට අනුව යුද්ධය අවසන් කිරීමට පෙර සපුරාගත යුතු බවට ට්රම්ප් ප්රකාශ කළ ඉලක්ක පහෙන් සමහරක් තවමත් අපැහැදිලි හෝ ඉටු නොවූ මට්ටමක පවතින බව විචාරකයෝ පවසති.
පෙබරවාරි 28 වන දින ආරම්භ වූ මෙම ගුවන් ප්රහාර මාලාව හරහා ඉරානයේ හමුදා ශක්තිය සහ නාවික බලය සැලකිය යුතු ලෙස විනාශ කිරීමට ඇමෙරිකානු සහ ඊශ්රායල හමුදා සමත්ව ඇති බව ධවල මන්දිර ප්රකාශිකා ඇනා කෙලී සඳහන් කළාය. ඉරානයේ ආරක්ෂක කර්මාන්ත පද්ධතිය අඩපණ වී ඇති අතර ඔවුන්ගේ න්යෂ්ටික සිහිනය දිනෙන් දින බොඳ වෙමින් පවතින බව ඇය අවධාරණය කරයි. කෙසේ වෙතත් යුද්ධය ආරම්භයේදී ප්රකාශ කළ ඉලක්ක කාලයත් සමඟ වෙනස් වී ඇති අතර ගෝලීය ආර්ථිකයට සහ මැදපෙරදිග ස්ථාවරත්වයට මෙයින් එල්ල වී ඇති බලපෑම හමුවේ ට්රම්ප් පරිපාලනය දැඩි පීඩනයකට ලක්ව සිටියි.
ඉරානයේ ඉස්ලාමීය විප්ලවීය ආරක්ෂක බලකාය (IRGC) තවදුරටත් බලයේ රැඳී සිටියදී ඇමෙරිකාව මෙම යුද්ධයෙන් ඉවත් වුවහොත්, එය ට්රම්ප් ජනාධිපතිවරයාට දේශපාලනික වශයෙන් අවාසිදායක විය හැකි බව දේශපාලන විචාරකයෝ පෙන්වා දෙති. විශේෂයෙන්ම ආරක්ෂක ලේකම් මාර්කෝ රූබියෝ සහ පෙන්ටගනය විසින් ඉදිරිපත් කළ යුද අරමුණු සහ ට්රම්ප්ගේ ප්රකාශ අතර පවතින පරස්පරතා හේතුවෙන් මෙම යුද්ධයේ අවසන් ප්රතිඵලය කුමක්ද යන්න පිළිබඳව ලෝක අවධානය යොමුව තිබේ.
