ඉරානයට එරෙහිව අමෙරිකාව සහ ඊශ්රායලය ඒකාබද්ධව දියත් කර ඇති ගුවන් ප්රහාර මාලාව දැන් තීරණාත්මක දෙවන අදියරකට පිවිසෙමින් පවතින බව විදෙස් පුවත් සේවා වාර්තා කරයි. මෙම නව අදියර යටතේ ඉරානයේ භූගතව (Underground bunkers) සඟවා ඇති මහා පරිමාණ බැලිස්ටික් මිසයිල ගබඩා සහ ඒවා දියත් කරන මධ්යස්ථාන ඉලක්ක කර ප්රහාර එල්ල කිරීමට ඊශ්රායල ප්රහාරක යානා සූදානමින් සිටින බව ආරක්ෂක අංශ ආරංචි මාර්ග උපුටා දක්වමින් රොයිටර් පුවත් සේවය සඳහන් කරයි. යුද්ධයේ මුල් සතිය තුළ ඉරාන නායකයන් සහ ගොඩබිම පිහිටි මිසයිල දියත් කිරීමේ මධ්යස්ථාන සිය ගණනක් විනාශ කිරීමට ඊශ්රායලය සමත්ව ඇති අතර, දෙවන අදියරේ අරමුණ වන්නේ ඉරානයේ ගුවන් ප්රහාරක හැකියාව සම්පූර්ණයෙන්ම අකර්මන්ය කිරීමයි.
පසුගිය බ්රහස්පතින්දා රාත්රියේ ඊශ්රායල ගුවන් හමුදාව විසින් ඉරානයේ බැලිස්ටික් මිසයිල ගබඩා කර තිබූ එක් භූගත යටිතල පහසුකම් මධ්යස්ථානයකට සාර්ථකව ප්රහාර එල්ල කර ඇති බව එරට හමුදාව තහවුරු කළේය. යුද්ධය ආරම්භ වීමට පෙර ඉරානය සතුව මිසයිල 2,500 ත් 6,000 ත් අතර ප්රමාණයක් පැවති බවට ඇස්තමේන්තු කර ඇති අතර, ඉන් සැලකිය යුතු ප්රමාණයක් තවමත් භූගතව සුරක්ෂිතව පවතින බව විශ්ලේෂකයෝ පවසති. මේ අතර, ඇතැම් ඊශ්රායල ප්රහාරක යානා එකම මෙහෙයුමකදී ඉරානයට සහ ලෙබනනයේ හෙස්බොල්ලා ඉලක්ක වෙත ප්රහාර එල්ල කරමින් සිටින බව ද වාර්තා වේ. ඉරාන පාලන තන්ත්රය බිඳවැටෙන තෙක් ඔවුන්ගේ හමුදා ශක්තිය තවදුරටත් දුර්වල කිරීම (Degraded) සිය අරමුණ බව ඊශ්රායල හිටපු ආරක්ෂක උපදේශකයින් ප්රකාශ කර ඇත.
