ඉරානයට එරෙහි යුද්ධයේදී ඇමෙරිකාව ඉශ්රායලය සමඟ එක්වීම ප්රසිද්ධ දේශපාලන විචාරකයෙකු වන ටකර් කාල්සන් (Tucker Carlson) දැඩි ලෙස විවේචනය කර ඇති අතර එමඟින් ඉශ්රායල අග්රාමාත්ය බෙන්ජමින් නෙතන්යාහු විසින් 2025 පෙබරවාරි මාසයේදී ජනාධිපති ඩොනල්ඩ් ට්රම්ප්ට ලබා දුන් “රන් පේජරය” පිළිබඳ මතභේදය යළි කරළියට පැමිණ තිබේ. මැදපෙරදිග කලාපයේ පවතින ගැටුම් සඳහා ඇමෙරිකාව සෘජුව මැදිහත් වීම සහ ඉන් ඇමෙරිකානු සෙබළුන්ගේ ජීවිත අහිමි වීම සම්බන්ධයෙන් බොහෝ දෙනා මේ වන විට ප්රශ්න කරමින් සිටිති.
සමාජ මාධ්ය ක්රියාකාරීන් සහ විචාරකයින් පෙන්වා දෙන්නේ නෙතන්යාහු විසින් ට්රම්ප්ට ලබා දුන් මෙම රන් පේජරය හුදු ත්යාගයක් නොව එය “සූක්ෂ්ම තර්ජනයක්” (Veiled threat) විය හැකි බවයි. ලෙබනනයේදී පේජර් යන්ත්ර පුපුරුවා හරිමින් ඉශ්රායලය දියත් කළ ප්රහාරයන් සිහිගන්වමින් මෙම ත්යාගය ලබා දීම හරහා ඇමෙරිකානු නායකත්වය මත යම් බලපෑමක් කිරීමට ඉශ්රායලය උත්සාහ කර ඇති බවට චෝදනා එල්ල වේ. ඇමෙරිකාව සහ ඉශ්රායලය එක්ව එල්ල කළ ප්රහාරයකින් ඉරාන උත්තරීතර නායක අයතුල්ලා කමේනි මියයාමත් සමඟ ඉරානය මැදපෙරදිග ඇති ඇමෙරිකානු මධ්යස්ථාන වෙත ප්රහාර එල්ල කිරීම ආරම්භ කර ඇත.
ටකර් කාල්සන් පවසන්නේ ඇමෙරිකාව තමන්ට අදාළ නැති යුද්ධයකට මැදිවී ඇති බවත් ඉශ්රායලයේ අවශ්යතා වෙනුවෙන් ඇමෙරිකානු තරුණයන්ගේ ජීවිත බිලිදීම වහාම නැවැත්විය යුතු බවත්ය. කෙසේ වෙතත් ජනාධිපති ට්රම්ප් ඉශ්රායලය සමඟ පවතින සබඳතාව දැඩි ලෙස ආරක්ෂා කරන අතර යුද්ධය ජය ගැනීම සඳහා සියලු ශක්තිය යොදවන බවට සහතික වී තිබේ. මෙම රන් පේජරය පිළිබඳ කතාව යුද්ධය පිටුපස ඇති රහසිගත දේශපාලන ගනුදෙනු පිළිබඳව සැක මතු කරන තීරණාත්මක සාධකයක් බවට පත්ව ඇත.
