ඉරානයේ මිනාබ් (Minab) නගරයේ පිහිටි බාලිකා පාසලකට එල්ල වූ දරුණු ගුවන් ප්රහාරයකින් සිසුවියන් සහ ගුරුවරුන් 175 දෙනෙකු ජීවිතක්ෂයට පත්වීමේ පුවතක් වාර්තා වීමත් සමඟ අමෙරිකානු දේශපාලන කරළිය උණුසුම් වී තිබේ. මෙම ඛේදවාචකය සම්බන්ධයෙන් අදහස් දක්වමින් ලුසියානා ප්රාන්තයේ රිපබ්ලිකන් සෙනෙට් සභික ජෝන් කෙනඩි (John Kennedy) ප්රකාශ කළේ, මෙය අමෙරිකාව අතින් සිදු වූ “බිහිසුණු වැරැද්දක්” (Terrible mistake) බවයි. රුසියාව වැනි රටවල් හිතාමතා මෙවැනි ප්රහාර එල්ල කළද, අමෙරිකාව කිසිසේත් හිතාමතා මෙවැන්නක් සිදු නොකරන බවත්, සිදුවූ විනාශය පිළිබඳව තමා දැඩි ලෙස කනගාටු වන බවත් ඔහු සඳහන් කළේය.
කෙසේ වෙතත්, මෙම ප්රහාරය සම්බන්ධයෙන් ජනාධිපති ඩොනල්ඩ් ට්රම්ප් පවසන්නේ එහි වගකීම තවමත් නිශ්චිතව තහවුරු වී නොමැති බවයි. ප්රහාරය සඳහා ටොමහෝක් (Tomahawk) මිසයිලයක් භාවිතා කර ඇති බවට වීඩියෝ සාක්ෂි හමුවී ඇතත්, එම වර්ගයේ මිසයිල වෙනත් රටවල් සතුවද පවතින බැවින් අමෙරිකාවට පමණක් චෝදනා කළ නොහැකි බව ට්රම්ප් පෙන්වා දෙයි. ඉරාන විප්ලවීය ආරක්ෂක බලකායට (IRGC) අයත් ගොඩනැගිල්ලක් ඉලක්ක කර එල්ල වූ මෙම ප්රහාරය පාසලකට වැදීම පිළිබඳව මේ වන විට විශේෂ පරීක්ෂණයක් ආරම්භ කර ඇති අතර, එහි වාර්තාව මත පදනම්ව ඉදිරි පියවර ගන්නා බව ධවල මන්දිරය අවධාරණය කරයි.
