පසුගිය පෙබරවාරි 28 වනදා ආරම්භ වූ ඉරාන යුද්ධය සම්බන්ධයෙන් ප්රථම වරට ජාතිය ඇමතූ ඇමෙරිකානු ජනාධිපති ඩොනල්ඩ් ට්රම්ප්, යුද්ධයේ මූලික අරමුණු මේ වන විට සපුරා ගනිමින් පවතින බවත් ඉක්මනින්ම එම කාර්යය අවසන් කරන බවත් අද (02) ප්රකාශ කළේය. මිනිත්තු 20ක කාලයක් පැවැති මෙම විශේෂ දේශනයේදී ඔහු අවධාරණය කළේ ඉදිරි සති දෙක තුනක කාලය තුළ ඉරානයට “අතිශය දරුණු” ප්රහාර එල්ල කරන බවයි.
ජනාධිපති ට්රම්ප් සඳහන් කළේ ඇමෙරිකානු හමුදාවන් විසින් පසුගිය දින 32 පුරා ඉතා ප්රබල සහ තීරණාත්මක ජයග්රහණ රැසක් අත්පත් කරගෙන ඇති බවයි. ඉරානය “නැවතත් ශිලා යුගයට” (Stone Ages) ඇද දමන බවට ඔහු මෙහිදී නැවතත් අනතුරු ඇඟවූ අතර, මෙම යුද්ධය සාධාරණීකරණය කිරීම සඳහා පළමු සහ දෙවන ලෝක යුද්ධ මෙන්ම වියට්නාම සහ ඉරාක යුද්ධයන්ට ගතවූ කාලය පිළිබඳව ද ඔහු මතක් කර දුන්නේය.
කෙසේ වෙතත්, හෝමූස් සමුද්ර සන්ධිය විවෘත කිරීම සම්බන්ධයෙන් ඉරානයට ලබා දී ඇති අප්රේල් 06 වනදා දක්වා වූ කාලසීමාව හෝ සාම සාකච්ඡා පිළිබඳව ඔහු මෙහිදී කිසිදු සඳහනක් කළේ නැත. ට්රම්ප්ගේ මෙම ප්රකාශයත් සමඟ ලෝක වෙළෙඳපොළේ තෙල් මිල 4%කින් පමණ ඉහළ ගොස් ඇති අතර ආසියානු කොටස් වෙළෙඳපොළේ ද යම් පසුබෑමක් දක්නට ලැබේ. ජනාධිපතිවරයා මෙම කතාව පවත්වන අතරතුර පවා ඉරානය විසින් ඊශ්රායලය, බහරේනය සහ කුවේටයේ පිහිටි ඇමෙරිකානු හමුදා කඳවුරුවලට මිසයිල ප්රහාර එල්ල කර ඇති බව වාර්තා වේ.
