ජාත්යන්තර නැව් ගමනාගමන ක්ෂේත්රයේ හරිතාගාර වායු විමෝචනය අවම කිරීම සඳහා යෝජිත කාබන් බද්ද (Carbon Levy) ක්රියාත්මක කිරීම වැළැක්වීමට අමෙරිකා එක්සත් ජනපදය සිදුකරන “බිය වැද්දීම්” සාර්ථක වෙමින් පවතින බව පරිසරවේදීන් අනතුරු අඟවයි. ලෝක නැව් ගමනාගමනයෙන් 5%කට පමණ දායකත්වය සපයන පැනමා ඇළ හිමි පැනමාව, මෙතෙක් මෙම බද්දට ලබා දුන් සහාය ඉල්ලා අස්කර ගනිමින් එය අවලංගු කිරීමේ යෝජනාවකට සම අනුග්රහය දක්වා තිබේ.
ලෝකයේ මුළු කාබන් විමෝචනයෙන් 3%කට වගකියන නැව් කර්මාන්තය සඳහා මෙම බද්ද පැනවීම හරහා වසරකට ඩොලර් බිලියන ගණනක අරමුදලක් දේශගුණික විපර්යාස අවම කිරීමේ කටයුතු සඳහා රැස් කිරීමට අපේක්ෂා කෙරිණි. කෙසේ වෙතත්, ඩොල්නඩ් ට්රම්ප් පාලනය විසින් පැනමාව වැනි කුඩා රටවලට රාජ්ය තාන්ත්රික හා ආර්ථික බලපෑම් එල්ල කරමින් පවතින බව වාර්තා වේ. විශේෂයෙන්ම වෙනිසියුලාවට එල්ල වූ අමෙරිකානු හමුදා මැදිහත්වීම් හමුවේ පැනමාව වැනි රටවල් තමන්ගේ ආරක්ෂාව පිළිබඳව දැඩි අවදානමකට ලක්ව සිටීම මෙම තීරණයට බලපා ඇති බව විචාරකයෝ පෙන්වා දෙති.
පැනමාවට අමතරව ආර්ජන්ටිනාව, ලයිබීරියාව සහ ග්රීසිය වැනි රටවල් ද මෙම බද්දට එරෙහි වීමට සැරසෙන බව ද ගාඩියන් පුවත්පත අනාවරණය කරයි. මෙම නව යෝජනාව සම්මත වුවහොත්, හයිඩ්රජන් වැනි පිරිසිදු බලශක්ති ප්රභවයන් වෙත යොමු වීම වෙනුවට නැවතත් ෆොසිල ඉන්ධන මත පදනම් වූ ද්රව ස්වාභාවික වායු (LNG) භාවිතය තහවුරු වනු ඇත. ලබන අප්රේල් මාසයේ පැවැත්වෙන ජාත්යන්තර සමුද්රීය සංවිධානයේ (IMO) රැස්වීමේදී මේ පිළිබඳව තීරණාත්මක සහ උණුසුම් සංවාදයක් ඇති වනු ඇතැයි අපේක්ෂා කෙරේ.
