අමෙරිකා එක්සත් ජනපදය සහ ඉන්දියාව අතර ඇති කර ගැනීමට නියමිත නව වෙළඳ ගිවිසුම්වලදී අමෙරිකානු වැසියන්ගේ අවශ්යතාවලට සහ සාධාරණත්වයට ප්රමුඛතාවය ලබා දෙන බව අමෙරිකානු නියෝජ්ය රාජ්ය ලේකම් ක්රිස්ටෝපර් ලැන්ඩෝ (Christopher Landau) ප්රකාශ කළේය. නවදිල්ලියේ පැවති ‘රයිසිනා සංවාදය’ (Raisina Dialogue) අමතමින් ඔහු කියා සිටියේ මීට වසර 20කට පෙර චීනය සමඟ වෙළඳ ගිවිසුම්වලට එළඹීමේදී සිදුකළ වැරදි ඉන්දියාව සමඟ නැවත සිදු නොකිරීමට ට්රම්ප් පාලනාධිකාරිය වගබලා ගන්නා බවයි.
දෙරට අතර ආර්ථික සහයෝගීතාව පුළුල් කර ගැනීම සඳහා දැනට සාකච්ඡා මට්ටමේ පවතින ද්විපාර්ශ්වික වෙළඳ රාමුව පිළිබඳව අදහස් දක්වමින් ලැන්ඩෝ මහතා පෙන්වා දුන්නේ ඕනෑම ස්වෛරී රාජ්යයක නායකයෙකු ප්රථමයෙන් සිය රටේ ජනතාවට වගකීමට බැඳී සිටින බවයි. ඩොනල්ඩ් ට්රම්ප් ජනාධිපතිවරයා “අමෙරිකාව යළි ශ්රේෂ්ඨ කිරීමට” උත්සාහ කරනවා සේම, ඉන්දීය අගමැතිවරයා ද සිය රට ශ්රේෂ්ඨ කිරීමට කටයුතු කරනු ඇතැයි අමෙරිකාව අපේක්ෂා කරන බව ඔහු වැඩිදුරටත් පැවසීය.
“අමෙරිකාව ප්රථමයෙන්” යන ප්රතිපත්තියෙන් අදහස් වන්නේ අමෙරිකාව ලෝකයෙන් හුදෙකලා වීම නොවන බවත්, අනෙකුත් රටවල් සමඟ සහයෝගයෙන් කටයුතු කිරීම මගින් එම අරමුණු වඩාත් සාර්ථකව ඉටු කරගත හැකි බවත් ඔහු පැහැදිලි කළේය. ඉදිරි දශක කිහිපය තුළ ලෝක දේශපාලනය සහ ආර්ථිකය හැඩගැස්වීමේදී ඉන්දියාවේ නැගී සිටීම අතිශය තීරණාත්මක සාධකයක් වනු ඇතැයි ද අමෙරිකානු නියෝජ්ය රාජ්ය ලේකම්වරයා මෙහිදී පෙන්වා දුන්නේය.
