ඉරානයේ නිෂ්පාදිත ප්රහාරක ඩ්රෝන යානා මර්දනය කිරීම සඳහා යුක්රේනය සතු අඩු පිරිවැය ‘ඉන්ටර්සෙප්ටර්’ (Interceptor) ඩ්රෝන තාක්ෂණය සහ ගුවන් ආරක්ෂක පද්ධති ලබා දීමට මීට මාස හතකට පෙර කළ යෝජනාව එක්සත් ජනපදය විසින් ප්රතික්ෂේප කිරීම දැවැන්ත උපායමාර්ගික වැරැද්දක් බව විදෙස් මාධ්ය පෙන්වා දෙයි. යුද්ධයෙන් පන්නරය ලැබූ මෙම තාක්ෂණය මිලදී ගැනීමට එදා අමෙරිකානු බලධාරීන් උනන්දුවක් නොදැක්වුවද වර්තමානයේ බටහිර ආසියාව තුළ අමෙරිකානු කඳවුරුවලට එල්ල වන ඉරාන ප්රහාර හමුවේ ඔවුන්ට යුක්රේනයේ සහාය පැතීමට සිදුව ඇත.
ජෝර්දානයේ පිහිටි අමෙරිකානු හමුදා කඳවුරු ආරක්ෂා කිරීම සඳහා යුක්රේන ජනාධිපති වොලොඩිමියර් සෙලෙන්ස්කි විසින් විශේෂ ඩ්රෝන විශේෂඥ කණ්ඩායමක් සහ යානා දැනටමත් යවා තිබේ. පෙබරවාරි 28 වනදා ඉරාන උත්තරීතර නායක අයතුල්ලා අලි කමේනිගේ මරණයට හේතු වූ ප්රහාරවලින් පසු ඉරානය විසින් ඉශ්රායලයට සහ අරාබි ගල්ෆ් කලාපයේ අමෙරිකානු හිතවාදී රටවලට දිගින් දිගටම ඩ්රෝන හා මිසයිල ප්රහාර එල්ල කරමින් සිටියි. ඉරාන ඩ්රෝන යානාවලට සාර්ථකව මුහුණ දීමේ පළපුරුද්ද යුක්රේනය සතු බැවින් අමෙරිකාවට සිය හමුදා ආරක්ෂා කර ගැනීමට දැන් එම තාක්ෂණය අත්යාවශ්ය වී තිබේ.
