ඉරානයේ ‘ඔටුන්න හිමි රත්නය’ ලෙස සැලකෙන කාර්ග් දූපතේ (Kharg Island) හමුදා ඉලක්ක වෙත ඇමරිකානු ප්රහාර එල්ල වීමට පැය කිහිපයකට පෙර, ජනාධිපති ඩොනල්ඩ් ට්රම්ප් ලබා දුන් සම්මුඛ සාකච්ඡාවක වීඩියෝවක් මේ වන විට සමාජ මාධ්ය ඔස්සේ දැඩි අවධානයට ලක්ව තිබේ. සිකුරාදා උදෑසන විකාශය වූ මෙම සම්මුඛ සාකච්ඡාවේදී ට්රම්ප් ප්රකාශ කර තිබුණේ කාර්ග් දූපතේ පාලනය අත්පත් කර ගැනීම සිය ප්රමුඛතාවක් නොවන බවයි. කෙසේ වෙතත්, “තමන්ට අවශ්ය නම් තත්පර කිහිපයකින් එම තීරණය වෙනස් කළ හැකි බව” ද ඔහු එහිදී අනතුරු අඟවා තිබුණි.
එම ප්රකාශයෙන් පැය කිහිපයකට පසුව ජනාධිපතිවරයා නිල වශයෙන් නිවේදනය කළේ සිය නියෝගය පරිදි ඇමරිකානු මධ්යම අණසක (CENTCOM) මගින් කාර්ග් දූපතේ පිහිටි සියලුම හමුදා ඉලක්ක සම්පූර්ණයෙන්ම විනාශ කළ බවයි. මැදපෙරදිග ඉතිහාසයේ එල්ල වූ ප්රබලම බෝම්බ ප්රහාර මාලාව මෙය බව පවසන ට්රම්ප්, ඉදිරියේදී එම දූපතේ පවතින තෙල් යටිතල පහසුකම් ද සිය මීළඟ ඉලක්කය විය හැකි බවට අනතුරු අඟවා ඇත. ඉරානයේ තෙල් අපනයනයෙන් බහුතරයක් සිදු කෙරෙන මෙම මර්මස්ථානයට එල්ල වූ ප්රහාරයත් සමඟ කලාපීය යුද්ධය අලුත් වටයකින් උණුසුම් වී තිබේ.
