ඇමෙරිකානු රැප් ගායක සහ සංගීත ක්ෂේත්රයේ දැවැන්තයෙකු වන සෝන් “ඩිඩී” කොම්බ්ස් (Sean “Diddy” Combs) බන්ධනාගාරයෙන් නිදහස් වීමට නියමිතව තිබූ දිනය පූර්ව නිවේදනයට වඩා කලින් ලබා දීමට ෆෙඩරල් බන්ධනාගාර කාර්යාංශය තීරණය කර තිබේ. ඒ අනුව, දැනට නිව් ජර්සි හි ‘ෆෝට් ඩික්ස්’ (Fort Dix) ෆෙඩරල් බන්ධනාගාරයේ රඳවා සිටින ඔහු 2028 අප්රේල් 25 වන දින නිදහස් වීමට නියමිත බව අද (මාර්තු 03) වාර්තා විය.
ගණිකා වෘත්තියට අදාළ චෝදනාවලට (prostitution-related charges) වැරදිකරු වී මාස 50ක සිරදඬුවමක් විඳිමින් සිටින 56 හැවිරිදි ඩිඩීගේ නිදහස් වීමේ දිනය මීට පෙර 2028 මැයි හෝ ජූනි මාස දක්වා දීර්ඝ කර තිබුණද, නවතම සංශෝධනයට අනුව එය අප්රේල් දක්වා ඉදිරියට ගෙන ඇත.
බන්ධනාගාරය තුළ ඔහු නීති උල්ලංඝනය කරන බවට පැතිර ගිය කටකතා ඔහුගේ ප්රකාශකයින් විසින් ප්රතික්ෂේප කර තිබේ. ඔහු ඉතාමත් විනයගරුකව සහ මත්පැන්වලින් තොරව සිය කාලය ගත කරන බවත්, තම දරුවන් සහ මව සමඟ සිටීමට ඇති අවස්ථාව අහිමි වීම පිළිබඳව ඔහු පසුතැවෙන බවත් වාර්තා වේ.
පසුගිය වසරේ ඔක්තෝබර් මාසයේදී ඔහු නිව්යෝර්ක් බන්ධනාගාරයේ සිට නිව් ජර්සි හි පිහිටි ආරක්ෂාව අඩු (low-security) මෙම බන්ධනාගාරය වෙත මාරු කර එවන ලදී. මෑතකදී බන්ධනාගාරය තුළදී ඔහු සිනාසෙමින් සිටින ඡායාරූප කිහිපයක් ද මාධ්ය වෙත නිකුත් විය.
තමා අතින් සිදුවූ වැරදි පිළිබඳව අධිකරණය හමුවේ ප්රකාශ කර ඇති ඩිඩී, තමා අධික අහංකාරකම (ego) නිසා මග වැරදුණු සාමාන්ය මනුෂ්යයෙකු බව පවසා තිබේ.
