ඇමරිකා එක්සත් ජනපදයේ අතිශය රහසිගත න්යෂ්ටික අවි පරීක්ෂණ පවත්වන මධ්යස්ථානයක් අසල අසාමාන්ය භූ කම්පන මාලාවක් වාර්තා වී ඇති බව විද්යාඥයෝ හෙළි කරති. ඇමරිකානු භූ විද්යා සමීක්ෂණ ආයතනයට (USGS) අනුව, රික්ටර් මාපකයේ 2.5 ට වඩා වැඩි ප්රබලත්වයකින් යුත් භූ කම්පන 16 ක් පමණ නෙවාඩා ප්රාන්තයේ ටොනොපා (Tonopah) පරීක්ෂණ කලාපය ආශ්රිතව හඳුනාගෙන තිබේ. මෙම ප්රදේශය ‘Area 52’ ලෙස ද හඳුන්වන අතර, එය ඇමරිකානු හමුදාව විසින් පර්යේෂණාත්මක ගුවන් යානා සහ නවීන අවි ආයුධ පරීක්ෂා කිරීම සඳහා යොදාගන්නා අතිශය ආරක්ෂිත කලාපයකි.
මෙම භූ කම්පන වාර්තා වන්නේ ඇමරිකාව සහ ඉරානය අතර පවතින දැඩි යුදමය උණුසුම මධ්යයේ වීම විශේෂත්වයකි. පසුගිය පෙබරවාරි 28 වැනිදා ඇමරිකාව සහ ඉශ්රායලය එක්ව ඉරානයට මිසයිල ප්රහාර එල්ල කිරීමෙන් පසු, ඉරානය ද අසල්වැසි රටවල් නවයක පිහිටි ඇමරිකානු කඳවුරු වෙත ප්රතිප්රහාර එල්ල කර තිබුණි. මෙම පසුබිම තුළ, ඇමරිකානු රජය ඉරානයට එරෙහි තවත් ප්රහාරයක් සඳහා සූදානම් වෙමින් රහසිගතව න්යෂ්ටික පරීක්ෂණ පවත්වන්නේ ද යන්න පිළිබඳව සැකයක් මතු වී ඇතත්, ට්රම්ප් පරිපාලනය ඒ පිළිබඳව මෙතෙක් නිල ප්රකාශයක් සිදු කර නොමැත.
විද්යාඥයන් පවසන්නේ රික්ටර් මාපකයේ 1.0 සිට 4.9 දක්වා වූ මෙම භූ කම්පන මාලාව පෘථිවි තැටි චලනය වීම නිසා ස්වාභාවිකව සිදු වූවක් විය හැකි බවයි. කෙසේ වෙතත්, පොළොව යට සිදු කරන න්යෂ්ටික පිපිරවීම් නිසා ද මෙවැනි භූ කම්පන ඇති විය හැකි බව ඔවුහු පෙන්වා දෙති. නිල වාර්තාවලට අනුව ඇමරිකාව සිය අවසන් භූගත න්යෂ්ටික පරීක්ෂණය පවත්වා ඇත්තේ 1992 වසරේදී වුවද, ජාතික ආරක්ෂක අවශ්යතා මත ඕනෑම මොහොතක එවැනි පරීක්ෂණ නැවත ආරම්භ කිරීමට අදාළ මධ්යස්ථාන සූදානම් කර ඇති බව න්යෂ්ටික කෞතුකාගාරය (Nuclear Museum) සඳහන් කරයි.
ලොස් ඇන්ජලීස් සිට සැතපුම් 180 ක් දුරින් සිටින වැසියන්ට පවා මෙම කම්පන දැනී ඇති බව වාර්තා වන අතර, එය හුදෙක් ස්වාභාවික සංසිද්ධියක් ද නැතිනම් නවීන යුධ අවි පරීක්ෂාවක ප්රතිඵලයක් ද යන්න පිළිබඳව ලෝක අවධානය යොමුව තිබේ. විශේෂයෙන්ම මැදපෙරදිග කලාපයේ යුද්ධය උත්සන්න වී ඇති මොහොතක, ඇමරිකාව සිය න්යෂ්ටික ශක්තිය යළි පරීක්ෂා කර බැලීමට පෙළඹී සිටිය හැකි බව විචාරකයෝ පවසති.
