ඉන්දියාවේ හෝලි උත්සවය නිමිත්තෙන් උත්තර ප්රදේශ් ප්රාන්තයේ සියලුම රජයේ කාර්යාල සඳහා දින තුනක නිවාඩුවක් ප්රකාශයට පත් කිරීමට ප්රාන්ත පාලනය පියවර ගෙන තිබේ. ප්රාන්ත අග්රාමාත්ය යෝගී ආදිත්යනාත් මහතාගේ උපදෙස් පරිදි මෙම තීරණය ගෙන ඇති අතර මාර්තු 02 වනදා සිට මාර්තු 04 වනදා දක්වා මෙම නිවාඩුව ක්රියාත්මක වේ.
මෙම නිවාඩු කාලසීමාව තුළ නොයිඩා (Noida) ඇතුළු ප්රාන්තයේ පිහිටි සියලුම රජයේ ආයතන වසා තැබෙනු ඇත. නිත්ය රජයේ සේවකයන්ට අමතරව කොන්ත්රාත් පදනම මත සේවය කරන සේවකයන් සහ සෞඛ්ය අංශයේ සේවකයන්ට ද මෙම සහනය හිමි වන බව වාර්තා වේ.
උත්සව සමයේ සේවකයන් මුහුණ දෙන මූල්ය අපහසුතා මගහරවා ගැනීම සඳහා සියලුම සේවකයන්ගේ මාර්තු මාසයට අදාළ වැටුප් කල්තියා ගෙවන ලෙස ද අග්රාමාත්යවරයා නිලධාරීන්ට නියෝග කර තිබේ. මෙම නියෝගය පැහැර හරින නිලධාරීන්ට එරෙහිව දැඩි ක්රියාමාර්ග ගන්නා බවට ද ඔහු අනතුරු අඟවා ඇත.
සිංගප්පූරුවේ සහ ජපානයේ සිව්දින සංචාරයකින් පසු ලක්නව් වෙත පැමිණි අග්රාමාත්යවරයා මෙම තීරණය ගෙන ඇති අතර, එම සංචාරය තුළදී උත්තර ප්රදේශ්හි කාර්මික වර්ධනය සඳහා රුපියල් ලක්ෂ කෝටි ගණනක ආයෝජන අවස්ථා දිනා ගැනීමට සමත් වූ බව ද සඳහන් වේ.
